رَسانک نیوز
پنچشمبهئے رۆچا ۱۴ دی۱۴۰۲، شستونئے تها اِتلاهاتئے کارگسئے نیروان یک بلۆچێن جهمنندے بِهنامئے جادها، اے شهرئے هۆشکئے دمگان بگئیر چه دادجاهئے هُکما آوار جتگ و رَند چه یک ساهتے آییئے لۆگئے سرا اُرش برتگ و گۆن لۆگانی کُبلئے پرۆشگا لۆگا شُتگ‌اَنت و لۆگِش پَٹّ و پاس کُرتگ.
آوار جتگێن بلۆچئے پجّار “اَبدُلکریم مُستپایی”، ۵۳ سالگ، پکیر مهمدئے چُکّ، ماروپ اِنت په کابل، سور کُرتگێن، هپت چُکّئے پت و شستونئے دمگان هۆشکئے نندۆک گوَشگ بوتگ.
اے هالانی رِدا، اتلاهاتئے کارگسئے نیروان کساس ساهت چارا گۆن دو ماشین، اَبدُلکریمِش آوار جتگ و نامالومێن جاهیِش بُرتگ.
گوشگی اِنت آییئے هَلکئے مردم و آییئے سیاد اتلاهاتئے کارگِس و سپاهئے کارگسا شُتگ‌اَنت و پَٹّ و پاسِش کُرتگ بله هچ پَسّئوے چه آییانی نێمگا دستِش نکپتگ و سرمستران آییئے آوار جَنَگ و آییئے لۆگئے سرئے اُرُش کنگئے نمنّۆک بوتگ‌اَنت.
چه آییئے آوار جنَگ و اے جمهنندئے جُرم و مئیارا هچ هالے تان انّون نرستگ.
Be the first to comment