رَسانک نیوز

یکشمبه ۳۰ مهر ۱۴۰۲، مئولوی اَبدالهمیدا اُستادان هپتگی مٹینگئل تها گوشتی: نزامی و امنیتی نیروانی آیَگ مکّی مسیتئے کِرّ و گوَران سئوب بیت که مردم درشانی بکننت و اگن اے نیرو مئیاینت بازێنے چه مشکلان آسانَ بنت.

مئولوی اَبدالهمیدا رند چه اشیا که اے دگر اُستادانی گپّ، نماز جمهئے رندئے پێشامدانی بارئوا اِشکتنت گوشتی: زاهدانئے مردمان، هۆنیێن جمهئے سالرۆچا کمّێن درشانیے نشان داتگ و وتی هبرِش کُرتگ‌اَنت، مسترێن درد مردمانی که رند چه آیانی لۆگئے مردمانی شهید بئیگا رند اشی بوتگ که بژن اِنت که انگت بارئوا هچ دارسیے نبوتگ و هچ کدمے په اشانی دردانی سکون کنگئے واستا چِست نبوتگ.

زاهدانئے پێشنمازا وتی گپانی ادامها گوشت: رند چه مردمانی ۷ مهر ۱۴۰۲ ئے درشانیان زاهدنئے تها، مئے واهشت هم همێشی بوتگ که مردم وتی درشانیا گۆن بێهبری و سکوتئے گۆما نشان بدئیت که انچۆ هم بوتگ.بله نزامی نیروانی هازر بئیگ مکّی مسیتئے کِرّ و گوَران، سئوب بیت که مردم گێشتر جزباتی (تحریک) ببنت و اگن دئولتئے نیرو گۆن اے بازی و زیادَهیئے گۆما مئیاینت مردم آرام بنت و هچ مشکلے پێش نئیئیت.

زاهدانئے دینی مدرسهئے سرمسترا گوشت: گوستگێن جمهئے (۲۸ مهر ۱۴۰۲) سئوب که سکّ هَسّاس بوتگ اے بوتگ که ائولی اش اِنت که سکّ باز نیرو رئوان دئیگ بوتگ و دومی پونکئے نمازجاه زۆرگیری درۆشما برگ بوتگ و سئیمی بازێن نپوزی (نفوذی) مردمے، مردمانی تها ودی بوتگ و مردمان دیستگ‌اَنت و گندگ بوتگ که همے مردم شُهار دئینت و مردمانی درشانیئے سئوب بنت. چۆ که ۱۳۷۲ ئے سالا که زاهدانئے مردمان (مسجد شیخ فیض) ئے بارئوا که هراب کنگ بوتگ اێتراز (اعتراض) بوتگ و نپوزی مردمان شیشگانی پرۆشگ بندات کُرتگ و مکی مسیتئے سرا تیرشانیِش کُرتگ.

مئولوی اَبدالهمیدا  وتی گپانی تها ادامه دات: اگه نزامی نیرو اے دمگان مئیاینت و امنیت و نزما همے مردمانی وتی دستا بدئینت دوێن گوَرئے مردمانی هئیال راهت بیت و مردم آسودگی رسنت. باید اِنت گوشگ ببیت که نزامی نیروانی آیگئے هچ نیازے نێست و مردم وت وتی امنیتئے هئیالداریا کننت.