رَسانک نیوز

گوَستگێن رۆچا ۱۲ مهر ۱۴۰۲، گَهئے نادْراهجاها داکترانی نادلکَشّیا، یک لاپ پُرّێن ماتے سزارێنئے هملئے چێرا بێران بوتگ.

اشیئے پجّار “ف ـ بلۆچی” ۲۷ سالیگێن، کسرکند کۆشاتئے نندۆک بوتگ.

گۆن اے ریپۆٹا، داکترانی نادراهجاهئے کارندهان کِساس زُهرئے وهدا اے لاپ پُرّێن مات چه همراها جِتا کُرتگ و چُنت ساهتا رَند چِٹّیے (نسخه) که دئوا نبشتگ بوتگ‌اَنت دئیگ بوتگ که زوت اے دَوایان بزورنت و بیارنت.

وهدے که همراه زایشگاها واتر بوتگ، کادر پزشکیا نادراهئے همراه (گُهاری) چۆ گوَشتگ که شمئے نادراهئے پَشار بُرز بوتگ و بێران بوتگ.

گوَشگ بوتگ که چُکّ پێداک بوتگ و دْراه اِنت بله نادراهجائے مَستر جوابگو نه‌اَنت که هچّ، گۆن بێران بوتگێن لاپّ پُرّئے همراهیان داکتران بدرپتاری کُرتگ و چه اُتاگ هملا ڈنّا کُرتگ‌اَنتش.