رَسانک نیوز

چارشمبهئے رۆچا ۳۰ هُرداد ۱۴۰۳، دُزاپئے چارمی نێمگئے شهرداریئے اُگدهداران گۆن بازێن ماشینے دُزآپئے کشاورزئے هلکا اُرُش برتگ و لۆٹتگش که یک جهمنندێن بلۆچیئے لۆگا هراب بکننت که گۆن لۆگئے واهند و مردمانی زهرشانیان دێم په دێم بوتگ‌اَنت و بس کمپانئے دیوالش هراب کُرتگ.

اے لۆگئے واهندئے پجّار (بهزاد آشپته [ریگی]) پنج کسانێن چُکّئے پت و کارگر و دُزآپئے شهرا کشاوررئے هلکئے نندۆک گوَشگ بوتگ.

بهزادا یک ویدئوے تها چه وتی زندگیا گوشتگ: من بهزاد آشپته، دُزآپئے بلۆچے آن و ایثارگرێن لۆگیئے مردمے آن که مرۆچیگێن رۆچا کساس ساهت پنچا دُزآپئے چارمی دمگئے شهرداریئے اُگدهداران گۆن بازێن ماشینیا مئے لۆگئے سرا که کشاورزئے تها اِنت اُرُش برتگ و گوشتگش ما را سی ملیون پول دئیێت یا که ما شمئے لۆگا هراب کنێن.

آییا ادامه دات: منا پول نبوتگ که بدئیان چیا که منی کار، کارگری اِنت و پلاستیکی هرابێن چیز جم کننت، شهرداریئے کارنده گۆن منا جنگ بوتگ‌اَنت و منی پُچ چه منا گورا در کرتگ‌اَنت و منا تهدیدش کُرت که ترا جاندار کنێن، منی مات و جنێن و منی چُکّ که لۆگئے تها بوتگ‌اَنت چه ترسا، وهشت کُرتگش. منی ماتا دلئے ناراهتی هست و چه ناراهتیا بێهۆش بوتگ و منی چُکّان تُرستگ.

اے بلۆچێن جهمنندئے گوشگانی گۆما، رَند چه اے اشیا که آییئے براتا چه شهرداریئے کارندهانی کارا زهرشانی کُرتگ، آییئے دستش تاب داتگ و جتگ و ٹپیگش کُرتگ و منی براتئے دست پُرشگئے درۆشما اِنت.

اے جهمنندێن بلۆچا آسرا گوشتگ که ما هیران اێن چه یک نێمگیا گوشنت که رای بدئیێت تان شمئے زندگیا شر بکنێن و چه دگه نێمگیا همے مئے گریبی زندگیا هراب کننت، چه دئولتا و هلکئے مردمان لۆٹێن تان مئے تئوار ببنت.

۲۰۲۳ئے میلادی سالا گۆن جم کُرتگێن هالان، امنیتی نهاد و اێرانئے جمهوری اسلامیئے دئولتا، بلۆچ نندێن ملکان کم چه کم ۲۱ جاها، لۆگش هراب کُرتگ و مردمانی زمینش زۆرئے سرا برتگ‌اَنت. گێشترێن زۆرگیری چهبارئے تهد گۆن هشت جاها و دُزآپئے تها گۆن هپت جاها گوَشگ بوتگ.