رَسانک نیوز

شمبهئے شپا ۱۹ هُرداد ۱۴۰۳، دو جهمنندێن بلۆچ پنۆچئے تها سلاهبندێن مردمانی تیرانی آماچ بوتگ‌اَنت که یکّے چه آیان وتی ساه چه دستا داتگ و آ دگه یک سکّ ٹپّیگ بوتگ و اێرانشهرئے هاتم الانبیائے نادراهجاها برگ و هاسێن جاها واپێنگ بوتگ.

کُشگ بوتگێن جهمنندئے پجّار (یاسین استادی) ۲۷ سالگ، ابراهێمئے چُکّ، سور کرتگێن و یک چُکّێئے پت و پنۆچئے نندۆک و ٹپّیگ بوتگێن جهمنندئے پجّار (ادریس بلۆچی) کریمئے چُکّ و کاکۆچئے نندۆک چه پنۆچئے دمگان گوشگ بوتگ.

گوشگ بوتگ که یاسینا گۆن سلاهبندێن مردمان مالی جێڑه بوتگ که اُرش برگئے تها یاسین و ادریس تیرانی آماچ بوتگ‌اَنت.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.