رَسانک نیوز

مرۆچی سئے شمبِه ۲۵ اردیبهشت ۱۴۰۳، (اهمد اَلی کۆهکن) چه دُزاپئے جُمَهئے هۆنێن ٹپیگان شمبهئے رۆچا ۱۸ پروردین ۱۴۰۳، رَند چه اِشیا که دُزآپئے اداره اتلاهاتا لۆٹاێنگ و آوار جنَگ بوتگ گۆن دو میلیاردی زمانتا آزات کنگ بوتگ.

(اهمد اَلی کۆهکن) ماروپ به اَلی اهمد، ۲۴ سال انتی، هلیمئے چُکّ، سور کُرتگێن و دو چُکّئے پت که یکّے چه آیان پلج اِنت، دانشجاه آزاتئے آموزش ابتدایئے گڈسری ترمئے واننده، و دُزآپئے نندۆک که کساس ۱۴۰۲ئے بهمنئے ماها اے سئوبا که ۸ مهرئے امنیتی نیروانی تیرگواریان ٹپّیگ بوتگ و دادگستریا شکایت کُرتگ.

اے جهمنند دُزاپئے هۆنێن جُمَهئے رۆچا گۆن نیروانی تیرگواریان آییا دو تیر لگن و سرێنئے تیر ورگا په وتی پروندهئے رسیدگیئے واستا شکایت کُرتگ و آمیدگسا گوشتگ که تئیی پسئو گۆن پئیام دئیگ بیت.

۱۶ پروردین ۱۴۰۳، اداره اتلاهاتا اهمدئے ماتئے سرا گوانک کُرتگ و گوشتگی که اے جنزئے ادارها برئونت و اگن مرئونت گُڑا اهمدا چه وانگجاهئے رئوگا دێمگیری کننت.

شمبهئے رۆچا ۱۸ پروردین اهمد اَلی گۆن وتی پت و ماتا اداره اتلاهاتا رئونت و امنیتی نیروانی دستا آوار جنَگ بوتگ و آییئے پت و مات چه اتلاهاتئے نیروانی نێمگا تادید کنگ بوتگ‌اَنت که زودتر چه اۆدا برئونت اگن نه آیان هم دزگیر کننت.

گوشگی اِنت که اهمد اَلیا ۲۲ پروردینا گوانکئے سرا وتی پت و مات گوَشتگ‌اَنت که آوار جنگئے وهدا چُنت رَندا تشنج کُرتگ و امنیتی نیروان آیی گوَشتگ که هۆنێن جمهئے توامێن ٹپّیگ بوتگێن مردم که شکایت کنۆک بوتگ‌اَنت، زوت زوتا وار جنَگ بنت.

اهمد اَلیا اے سئوبا که یک پلجێن چُکّے هست و مشهدئے تها درمان بئیگا اِنت مجبور اِنت اے شهرل بیئیت و پێسریگێن ترما اے سئوبا که باز رئو و آیی کُرتگ گئیبتی وارتگ و چه پشتکپگێن درسا شرّێن نتیجه گپت کُرتی نکُرتگ.

گوشگی اِنت که اهمد اَلیئے آ دگه برات (اَلی اکبر کۆهکن) هم ۱۷ بهمن ۱۴۰۲ گۆن (هارس کروتا) دُزپئے یکّے چه جادهان آوار جنگ بوتگ که آیی رَند چه ۹ رۆچا ۲۶ بهمنا آزات کنگ بوتگ و هارس تان انون دُزآپئے بندیگئے کانونئے تربیتئے دستا گۆن بلاتکلیپی بندیگ‌اِنت.