رَسانک نیوز

پنجشمبه رۆچا ۱۳ اردیبهشت ۱۴۰۳، گۆن یک ٹێلکشێن سایپاێن ماشینیئے چپّ کنگا کساس سنگانئے هلکا، نزّیک دشتیاریئے دمگان دو ٹێلکشێن بلۆچ ٹپّیگ بوتگ‌اَنت.

چه اے جهمنندێن بلۆچانی پَجّارا هچ هالے نێست.

گوَشگ بیت که هلکئے مردمان اے ٹپّیگ بوتگێن ٹێلکش نادراهجاها برتگ‌اَنت.

گوَشگ ببیت که ٹێلکشی چه هما کاران هساب بیت که که بازێنے چه بلۆچ جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیل چۆ گاڑیئے چپّ کنگ و امنیتی و نزامی نیروانی تیرگواریان دێم په دێم بنت و آیانی جانا تهدید کنت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.