رَسانک نیوز

چارشمبه شپا ۱۲ اردیبهشت ۱۴۰۳، یک ورناهێن نۆدربرے گۆن نامالومێن سلاهبندێن مردمانی تیرگواریان کلّێنکئے دێما پهرهئے دمگا، گۆن تیرئے لگّگا سکّ ٹپّیگ بوتگ.

اے جهمنندێن بلۆچئے پجّار (جئواد کریمزایی)، ۱۶ سال انتی، یاسینئے چُکّ، آشارئے مردم چه سربازئے دمگان و پهرهئے نندۆک گوَشگ بوتگ.

همے هالانی رِدا، سلاهبندێن مردمان کساس شپئے ساهت ۱۰ آ جئواد جادهئے سرا بوتگ آییئے نێمگا تیرگواری کُرتگ که آییئے سرێنا تیرا لگّتگ و ٹپّیگ بوتگ.

رَند چه اے تیرگواری و ورناهێن بلۆچئے ٹپّیگ بئیگا، هلکئے مردمان، آییی نادراهجاها بُرتگ و زی جراهیئے اَمَل آییئے سرا انجام دئیگ بوتگ.

چه جنۆکانی سئوبا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.