رَسانک نیوزئے سربوتگێن هالانی ردا، پنچشَمبِهئے رۆچا ۵ بهمن ۱۴۰۲، بلۆچ دارجێن رئوانکئے سرۆک داکتر مھرنگ بلۆچا مان چاگردی رسانکدر ایکسا نبشتگ که اے دارجێن رئوانکئے تها گوَستگێن رۆچ منی سرجمێن سیاسی سپرئے وشترێن رۆچ بوتگ.
آییا نبشتگ که من وتی سیاسی سپرئے وشترێن رۆچ گۆن بلۆچستانئے شێرزال و بلۆچ بچان گوَازێنت.
داکتر مهرنگ بلۆچا گوَشتگ که من دلجمان که ما یک رۆچے وتی سرڈگارا اێمن کنێن، که ھچ کھۆل سرگردان نبیت، ھچ ماتئے زھگ بێگواہ نبیت، ھچ زھگ چۆرہ کنگ نبیت، گھارانی برات بندیگجاھان بند کنگ نبنت، ورنا گۆن اێمنیا وتی کھۆلانی کرّا زند گوَازێننت، کَس درانڈێه نبیت، وژھالی و اێمنیَ بیت.
تان دو ماها بلۆچ زھرشانیئے نندانک پاکستانئے بنجاھی شھر اسلام آباد پریس کلبئے دێما نشتگ و زیکێن رۆچا دێم په بلۆچستانا واتر بوتگ. دۆشی ژوبا پشتۆن تھپز موومنٹئے باسکان رئوانک وش آتک کُرتگ مرۆچی سھبا کچلاکا ھم پشتون تھپز موومنٹئے باسکان وش آتک کرتگ‌اَنت.
مرۆچی یک وھدے رئوانک شالا سر بیت، مردم شرێن وڑێا رئوانکا وش آتک کننت. گوَستگێن رۆچا بلۆچ یکجهتی کمیٹیئے نێمگا پنتاک بهر و بانگ کنگ بوتگ و تامُربندێا مردم سرپد کنگ بوتگ‌اَنت که په رئوانکئے وش آتک کنگا جاڑی ببنت.
Be the first to comment