شستونا دو کسئے بێران بئیگ گۆن نزامی درێسان، تراکێئے سئوبا

رَسانک نیوز

گوَستگێن شپا ۲۳ دئے ۱۴۰۲، دو کس که یکّے چه آیان نزامی درێس گوَرا بوتگ جُمَه بازارئے دمگان، اداره برگئے چار راها، سیمسرئے هنگئے (مرساد) دو سد متریا تراکئے سئوبا بێران بوتگ‌اَنت.

چه اِشانی پَجّارا تان انگت هچ هالے نێست.

همے هالانی رِدا، بلۆچستان و سیستانئے استاندارئے نایِبا گۆن هکومتی رَسانکان جار جتگ که اے دوێن نپران لۆٹتگ هراب کاری بکننت که هما تْرکّگی مئوادئے گۆن که گۆنِش بوتگ‌اَنت بێران بوتگ‌اَنت.

گوشگی اِنت که اێرانئے جمهوری اسلامی رژیمئے رَسانکان یک اَکسے چه اے دوێن نپران شِنگ کُرتگ و گوَشۆک‌اِنت که اشی یکّے چه بێران بوتگێنان اِنت.

گۆن اَلّمێن جاهیئے رَستگێن هالا، کساس چه چُنت هپتگ پێسر مزنێن امنیتی سرمستر چه تهران، شستونا آتکگ‌اَنت و پرمان داتگِش که پێسرا شستونئے سیمسرا و پدا همے راستیا تان گواتر پورهی سرا بند کنگ ببیت و ٹێلکشّێن ماشین هم رئوگ و آیگئے اجازت دئیگ مبنت.

انچۆ مرۆچیگێن سُهبا، اے سرمستر گۆن وزارت اتلاهاتئے نیروان، گۆن سپاهئے اتلاهات و انتزامیئے اتلاهاتئے، تراکئے جاها شُتگ‌اَنت و همے کسهئے وارسیا هبر و هالِش جۆڑ کُرتگ.