رَسانک نیوز
دوشمبهئے رۆچا ۱۸ دئے ۱۴۰۲، “مازیار شه بکش”، بلۆچێن بندیگ بوتگێن ورنا، که ۱۴۰۰ئے اسپند ماها، زاهدانئے اتلاهات سپاهئے نیروانی دستا آوار جنَگ بوتگ، رَند چه ۶۷۱ رۆچ دُزآپئے بندیگ بئیگئے گوَزگا چه دُزآپئے مرکزی بندیگا آزات بوتگ.
مازیار ۱۴۰۰ئے هُردادئے ائولی رۆچئے پێداک بوتگێن چُکّ و ملک مهمدئے چُک‌اِنت، رَند چه امنیتی نیروانی اُرش برگ آییئے لۆگئے سرا، آوار جنَگ بوتگ که دزگیری وهدا کمتر چه ۱۸ سالا آییئے اُمر بوتگ.
گوشگی اِنت که ۱۴۰۰ئے شهریورئے هشتمی رۆچا، دُزآپئے اتلاهات سپاهئے نیروان، چه مازیارا بندیگئے تها جُست و پرسِش کُرتگ و آییش زۆرئے سرا مَنّێنتگ و پاهوئے تهدیدِش کُرتگ.
رستگێن هالانی رِدا، منّێنۆکان مازیار گوَشتگ: “وتی هلکئے مردمانی سرا گْوانکو بکنت و چه آیان بلۆٹیت که تئیی اێدامیئے سادئے زرّانی اَڈ گیریا بکننت تان که ترا تئیی پت و ناکوئے کِرّا آ دگه دنیایا رئوان بدئیێن”.
گوشگی اِنت که مازیار بندیگئے وهدا هم اتلاهات سپاهئے نیروانی دستا جُست و پرس کنگ بوتگ و هم اداره اتلاهاتئے دستا جُست و پُرس کنگ بوتگ و مازیارئے دێما شکنجهئے ٹَپّانی پد چۆ چمّئے چێرئے سیاهی و پیشانیگ و دێمئے سرئے ٹَپّ، رَند چه بازداشتگاهئے واتر دئیگا اێر بوتگ‌انت.
گوَشگ ببیت که مازیارئے پت، ملک مهمد شه بکش اِنت که ۱۴۰۰ئے آبانئے بیست و چهارمی رۆچا، کرمانئے ابوزرئے کرارجاهئے عملیاتیئے نزامی نیروانی درگیریئے تها بێران بوتگ و آییئے ناکو، گُلام شه بکش ۱۴۰۰ئے دئے ماهئے یازدهمی رۆچا، گۆن سپاهئے نیروانی اُرش بَرگا آییئے لۆگئے سرا دُزآپئے شهرا کۆرینئے هلکا بێران بوتگ.
Be the first to comment