رَسانک نیوز

یک بلۆچێن زندانیے که اسپهانئے زندانا بندیگ بوتگ و پێسرا هم مئواد مُهدرئے جُرمئے واستا اێدامئے مهکوم بوتگ، نزّیکێن اێدامیئے هترئے تها اِنت.

اے باشندهێن بلۆچئے پجّار “زاکر آرامش” ۲۵ سالگ، درمهمدئے چُک و سربازئے شهر و ڈۆرکئے هلکئے نندۆک گوشگ بوتگ.

گۆن اے رستگێن هالا، پاریگێن سالا آرامش و دگه دو نپر اِسپهانا په کارئے درگێجگا شُتگ‌ و شپا یک امبارێئے تها آرامِش کُرتگ.

گوشگ بیت که امبارئے ساهبا زاکر و آییئے سنگت چه مئوادئے هالا سهیگ نکُرتگ و آ هبر نبوتگ‌اَنت و رند چه نیروانی اُرش کنگا دزگیر کنگ بوتگ‌اَنت که دو نپر آزات کنگ بوتگ‌ بله زاکر اسپهانئے شهرئے دادجاه انکلابئے هُکما، اێدامئے واستا مهکوم کنگ بوتگ.

گوشگی اِنت که دادجاهئے سرمستران زاکرئے لۆگئے مردم گوشتگ‌اَنت که دو میلیارد و پنسد میلیون تُمن بیارێت که زاکرئے اێدامئے هُکما کئینسل کنێن.

گوشگی اِنت که زاکرئے هلکئے مردم کشاورز اَنت و اے زرّئے دئیگئے توانِش نێست، همے واستا چه دْراهێن مردمان کُمکئے لۆٹۆک‌اَنت.