رَسانک نیوز

شمبه ۲۲ مهر ۱۴۰۲، نێکشهر و اێرانشهرئے راها گۆن نیرو انتزامیئے تیرشانیان، یک بلۆچێن باشندَهے سک ٹَپّی بوتگ و رند چه آییئے نادراهجاها برگا بێران بوتگ.

اے باشندهێن بلۆچئے پجّار “آسپ ماککی” کساس ۳۳ سالگ، اهمد اَلیئے چُکّ، چشمه زیارتئے مردم و زاهدان کئوسرئے هلکئے نندۆک گوشگ بوتگ.

گۆن اے رستگێن هالا، آسپ وتی ماشینئے گۆما نیکشهرئے راها رئوگا بوتگ که نزامی نیروان بے دَمکی دئیگا، تیرشانیش کُرتگ و پادئے شاه رگئے تیر ورگا ٹَپّی بوتگ.

گوشگ بیت که آسپ رند چه تیرئے ورگا و آییئے رسێنگ مان نادراهجاها، هۆنریچی باز بوتگ و بێران بوتگ.

آییئے لۆگئے مردمان دومی رۆچا وتی بێران بوتگێن چُکّئے لاشئے گِرگا نیکشهرا آتکگ‌اَنت و دوشمبه ۲۴ مهر ماها وتی پێدایشئے جاهئے کبرستانا، نلوکی، چمگ زبارتئے هلکا و زاهدانئے دَمگا هاک کنگ بوتگ.