رَسانک نیوز/ یکشمبے روچ 25 مرداد ماہ 1405، دُزاپ ءِ بندیگجاہ ءَ بلوچیں بندیگی کہ چہ پیش ءَ پہ کوشئے تُهمت ءَ پاھو ئے ھکمی وارتگ، پاھو دیئگ بوتگ. اے بندیگ سال 1402 ءَ دزگیر ءُ گوں اِنساپ ءِ جاورانی دیمروی ءَ پاھو ئے ھکمی وارتگ.
بلوچستانئے انسانی ھکّانی گل ئے کانال ءَ اے بلوچیں بندیگئے پجّار «مهمد (چراگ) اپروکتہ»، کِساس 30 سالگ، ھبیب الرھمان ئے چُک، آروس کرتگ ءُ یک زھگئے پت، سب ءُ سورانئے بالدان دمگئے نندوک زانتگ.
اے ھالئے رِد ءَ، مهمد ماں سال 1402 ءَ وتی سیادییے ھوری ءَ پہ جهمنندیں امنیتی کارمند ئے کوشئے الزاما ماں سب ءُ سوران ءَ دزگیر کنگ بوتگ. ھال سرکنوکان ءَ گوَشتگ «دزگیر بوھگ ءَ رَند گوں لٹ ءُ شاپ ءُ آزار دیئگ ءَ مهمد پہ اے کوشئے کنگ ءَ منّینگ بوتگ» ءُ چُنت ماہ پیش پہ آییا پاھو ئے ھُکم بُرّگ بوتگ. آ دگہ جهمنندی کہ پہ ھمے الزاما دزگیر کنگ بوتگ، آجو بوتگ.
اے ھال سرکنوکان ءَ گوَشتگ آییئے پاھو دیئگئے روچ کہ نزّیک آتکگ «مهمد پنچشمبے روچ (22 مرداد ماہ)»پہ پاھو دیئگ ءَ ایوکیں واڈ ءَ شور دیئگ بوتگ. لوگئے مردمان ءَ شمبے روچ ءَ گوں آییا گُڑسریں دیدار کرتگ. آییئے پاھو ئے ھُکمئے سرا یکشمبے روچ 25 مرداد ماہ ءَ کاروایی بوتگ ءُ ھماں روچئے ساھت 17 ءَ بے ساھیں جون ماں بالدان دمگئے ھڈ ائیردہ ءَ مانش ءَ ائیر دیئگ بوتگ.
Be the first to comment