رَسانک نیوز

پنچشمبهئے رۆچا ۲۴ هُرداد ۱۴۰۳، یک جهمنندێن بلۆچے گۆن وتی موتورا چه وتی هلکا کادرآبادا که سراوانئے راها اِنت جالگ رئوگا بوتگ، سلاهبندێن مردمانی راستێن تیرانی آماچ بوتگ و گۆن دو تیرئے ورگا ٹپّیگ بوتگ.

اے بلۆچێن جهمنندئے پجّار (دادرهمان سپاهی) ۳۴ سالگ، نورمهمدئے چُکّ، سور کُرتگێن و پنچ چُکّئے پت و ناهۆکئے هلکئے مردم چه سراوانئے دمگان گوَشگ بوتگ.

گوَشگ بیت که گۆن اے تیرگواریان، دادرهمان چه پادئے نێمگا ٹپّیگ بوتگ و شستونئے رازیئے نادراهجاها برگ بوتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.