رَسانک نیوز

سئے شمبهئے رۆچا ۸ هرداد ۱۴۰۳، سپاهئے راستێن تیرگواریانی و بگئیر چه پێسری هشدار دئیگا، بلۆچێن ٹێلکشانی نێمگا ماشکێلئے تها شگربی بلۆچستانا، جودرئے سیمسرئے دمگان، کله گانئے هلکا و شستونئے شهرا، کم چه کم چار ٹێلکشێن بلۆچا وتی ساه چه دستا داتگ، چار کس ٹپّیگ بوتگ و چار کس چه ٹێلکشان بێگواه اَنت.

چارێن کُشگ بوتگێن ٹێلکشانی پجار (اَبدُلواسه ریگی) ۱۸ سالگ، ملا سُلئیمانئے چُکّ، (شکرُلّاه ریگی) ۲۳ سالگ (هواستی ریگی) و (اسگر ساسولی) ۲۲ سالگ، مهمد اکبرئے چُکّ، دراهێن چه ماشکێلئے مردمان چه شگربی بلۆچستانا گوشگ بوتگ‌اَنت.

یکّے چه ٹپّیگ بوتگێن ٹێلکشانی پجار (اَبدُلّاه ریگی) سُلئیمانئے چُکّ گوَشگ بوتگ.

گوشگی اِنت که اَبدُلّاه و دگه یک ٹێلکشّے که آییئے پجّار مالوم نه‌اِنت سپاهئے نیروانی دستا آوار جنگ و شستون برگ بوتگ و دو ٹپّیگ بوتگێن ٹێلکش نادراهجاها برگ بوتگ‌اَنت.

چه ٹپّیگ بوتگێن ٹێلکشانے که ماشکێلا برگ بوتگ و انچۆ چه چار ٹێلکش که تیرگواریئے وهدا اۆدا بوتگ اَنت چا آیانی جاورهالا هچ هالے دستا نرستگ.

گوشگی اِنت که سئے شمبهئے رۆچا جوردر و کله گانئے سیمسرا بلۆچێن ٹێلکش، آ نێمگئے نێلکشانی ودارا بوتگ‌اَنت که ٹیلان بیارنت که اچانگ سپاه پاسدارانئے نیروان بگئیر چا پێسری هشدارا تیرگواری کُرتگ که کم چه کم هشت کس ٹپّیگ و بێران بوتگ و چار کس گار و بێگواه بوتگ.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.