رَسانک نیوز
دوشمبه رۆچا ۲ خرداد ۱۴۰۳، یک بلۆچێن جهمنندے گۆن (سهد دینارزهیئے) ناما، ۲۰ سالگ، که اردیبهشتئے دومی رۆچا رَند چه اتلاهاتئے ادارهئے اُرش برگا (گتانئے) هلکا، مینانئے ملکا، سربازئے دمگان، آوار جنَگ بوتگ، گۆن ۳۱ رۆچئے گوَزگا چه آییئے آوار جنَگا، انگت بند اِنت و بلاتکلیپیئے تها اِنت.
گوشگ بیت که گۆن امنیتی و نزامی نیرو وت چُنت ده ماشین و گرانێن جنگی سلاهان گتانئے هلکئے سرا اُرش برتگ، سئے جهمنند گۆن سهدئے گۆما که آیانی پجّار (زرین دینارزهی) ۲۴ سالگ، (منسور دینارزهی) ۲۸ سالگ، هر دوێن اِبدُلسمدئے چُکّ و سهدئے برات و دراهێن چه کهیرپتانئے هلکا، راسکئے دمگان و (اَبدُلوهاب دینارزهی)، اے سئیێن نپرانی ناکۆگ، سپاهئے اداره اتلاهاتئے دستا آوار جنَگ بوتگ‌اَنت.
همے هالانی رِدا، منسور و اَبدُلوهاب دوشمبهئے رۆچا ۳۰ اردیبهشت ۱۴۰۳ رَند چه ۲۸ رۆچا آزات بوتگ بله سهد انگت بندیگ و بلاتکلیپیئے تها اِنت و آییئے هلکئے مردم چه آییئے سلامتیئے هالا پرێشان اَنت.
اے چُنت کس گۆن امنیتی نیروانی هِژمئے گۆما آوار جنَگ بوتگ‌اَنت که سهدئے کار کشاورزی و شوانگی اِنت و منسور و زرین ٹێلکشی کنگا اَنت و چه اے جهمنندانی آوار جنَگئے سئوبا اَنگت هچ هالے نێست.
Be the first to comment