رَسانک نیوز

پنچشمبه رۆچا ۲۷ اردیبهشت ۱۴۰۳، دشتیاریئے شهر نۆبندیانئے دمگان کچئے هلکا یک کسانێن چُکّے گوَرمیئے تها کپتگ و وتی ساهی چه دستا داتگ.

اے کسانێن چُکّئے پجّار (مۆلهم کدهدای) ۲ سالگ، اکرمئے چُکّ ماروپ په (اکرم موچا) کچئے نندۆک چه دشتیارئے دمگان گوَشگ بوتگ.

گوشگی اِنت رَند چه بازێن هئورانی گوارگ و آپئے راه کپگا، بازێنے چه هۆٹگ و کَلّان پر چه آپ بوتگ و اے ماهانی تها بازێنے چه چُکّان چه بلۆچستانئے جاه جاهان بُکّ گِرگئے سئوبا وتی ساهِش چه دستا داتگ.

هۆٹگ هما آپے گوشگ بیت که اَبرمی درۆشما یا که گۆن مردمانی دستئے گۆما اَڈ کنگ بوتگ و مردم چه آپے که آییئے تها جم بوتگ، کارمرز کننت.

گوشگ ببیت که دشتیاریئے دمگئے مردم چه لوله کشی و آپئے سهولتا زِبهر اَنت و مردم چه همے آپانے که هۆٹگئے تها جم بوتگ‌اَنت وتی ورگئے و زندگیئے واستا کارمرز کننت.