رَسانک نیوز

جُمَهئے رۆچا ۸ تیر ۱۴۰۳، یک جهمنندێن بلۆچے چه اورژانسئے کارندهان نێکشهرئے شهرا ساربۆگئے هلکا چه کسرکندئے دمگان ناملومێن سلاهبندێن مردمانی دستا تیرانی آماچ بوتگ و وتی ساهی چه دستا داتگ.

اے جهمنندێن بلۆچئے پجّار “اَبدُلهالک بلیده (رئیسی)” کساس ۳۵ سالگ، زمانئے چُکّ، سور نکُرتگێن و ساربۆگئے هلکئے مردم چه کسرکندئے دمگان گوَشگ بوتگ.

همے هالانی رِدا، اے وئیل کساس ۲۰:۵۰ دکیکتا پێش آتکگ و سلاهبندێن مردمان گۆن انتگامئے نیمّۆنا اے جهمنندئے سرا اُرش بُرتگ که آیی گۆن چُنت تیرئے ورگا ٹپّیگ بوتگ و نێکشهرئے نادراهجاهئے راها وتی ساهی چه دستا داتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.