رَسانک نیوز
۲۷ هُرداد ۱۴۰۳ئے شپا، یک جهمنندێن بلۆچے گۆن وتی یکے چه سیاداتی راستێن تیرگواریان یک جێڑهیئے سئوبا، تیرئے آماچ بوتگ و وتی ساهی چه دستا داتگ.
اے بلۆچێن جهمنندئے پجّار (نزیر ملازهی) ۲۳ سالگ، مهمد اکرمئے چُکّ و کان ملکئے هلکئے مردم چه سب و سۆرانئے شهرا گوَشگ بوتگ.
همے هالانی ردا، نزیر وتی لۆگئے تها کهن ملکئے هلکا سب و سۆرانئے شهرا یکّے چه وتی سیادانی دستا یک جێڑهیئے سئوبا گۆن کمری کُلتیئے گۆما تیرانی آماچ بوتگ و بازێن ٹپّانی سئوبا وتی ساهی چه دستا داتگ.
گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.
Be the first to comment