رَسانک نیوز

چارشمبهئے رۆچا ۳۰ هُرداد ۱۴۰۳، یک جهمنندێن بلۆچے کنتئے هلکا هیدوچئے دمگان سب و سۆرانئے شهرا نامالومێن سلاهبندێن مردمانی تیرانی آماچ بوتگ و گۆن چُنت تیرئے لگّگا وتی ساهی چه دستا داتگ.

اے جهمنندێن بلۆچئے پجّار (اکبر پاهنگ) ۳۰ سالگ، مهمد اُمرئے چُکّ، کنتئے هلکئے مردم هیدۆچئے دمگان چه سب و سۆرانئے شهرا گوَشگ بوتگ.

گوشگی اِنت که اکبر چارشمبهئے شپا وتی دُکانئے تها چیزانی جم کنگا بوتگ که دو موتور سئوارا آییئے نێمگا تیرگواری کُرتگ و آیی گۆن تیرانی ورگا وتی ساهی چه دستا داتگ.

چه جنۆکان جنگئے سئوبا و آیانی پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.