رَسانک نیوز

جُمَهئے رۆچا ۲۵ هُرداد ۱۴۰۳، یک آوار جتگێن بلۆچے که چارشمبهئے رۆچا ۲۳ هُرداد، نزامی نیروانی دستا آوار جنَگ بوتگ و مئواد مخدرئے ادارهئے بندیگا برگ بوتگ، اے بندیگئے تها شکنجهانی چێرا وتی ساهی چه دستا داتگ.

اے بلۆچێن جهمننندئے پجّار (مهمد گُرگێچ) ۳۱ سالگ، امین الّاهئے چُکّ و سئے چُکّئے پت و دُزآپئے دمگان شێرآبادئے هلکئے مردم گوَشگ بوتگ.

همے هالانی رِدا، کساس شپئے ساهت ۱۰ آ، مهمد وتی پتئے لۆگا رئوگا بوتگ که نزامی نیروان آوار جتگ و آییئے لۆگ و هلکئے مردمان هئیال کُرتگ که آییئے سرا وئیلے کپتگ جُنزگا بوتگ‌اَنت که آییا دربگێجنت که گۆن سئے رۆچئے گوَزگا چه مئواد مخدرئے ادارها آییئے پتئے سرا پئون کُرتگش و آییش مئواد مخدرئے ادارها لۆٹاێنتگ و گوشتگش (آییئے چُکّا گوستگێن رۆچا مئواد مخدرئے ادراها وتی ساه چه دستا داتگ).

گوَشگ بیت که آییئے پتا چه اے ادارهئے کارندهان آییئے بێران بئیگئے سئوب جُست کُرتگ و گوشتگی که آییئے چُکّا پێش بدارنت که آیان بگئیر چه اِشیا که پسئو بدئینت و بگئیر چه اِشیا که آییئے چُکّا آییا پێش بدارنت آییئے پتِش گوَشتگ‌ که یکشمبهئے رۆچا بیاینت و وتی چُکّئے لاشا ببرنت.

گوَشگی اِنت که مهمدئے لۆگئے مردمان چه اداره مئواد مخدرئے بندیگجاهئے اُگدهدارن شکایت کُرتگ و اَلّم اَنت که آییئے چُکّ شکنجهئے چێرا وتی ساهی چه دستا داتگ.

چه اے جهمنندئے بند بئیگئے سئوب و آییئے جُرما تان انّون هچ هالے دستا نکپتگ.