رَسانک نیوز

یکشمبهئے رۆچا ۱۳ هُرداد ۱۴۰۳، نامالومێن سلاهبندێن مردما هوشکئے هلکا چه شستونئے شهرا، یک ماشینے تیرانی آماچ کُرتگ، که یک بلۆچێن جهمنندے ٹپّیگ بوتگ.

ٹپّیگ بوتگێن جهمنندێن بلۆچئے پجّار (سلمان ایرندگانی) ۱۸ سالگ، هوشکئے مردم، شستونئے شهرئے دمگان گوَشگ بوتگ.

یکشمبهئے اَسرا، سلمان گۆن دو کس چه وتی سنگتان گۆن ماشینا رئوگا بوتگ‌اَنت که ۴۰۵ێن پژو والاێن مردمانی تیرانی آماچ بوتگ‌اَنت و گۆن یک تیریئے ورگا ٹپّیگ بوتگ.

چه جنۆکانی سئوبا انگت هچ هالے دستا نکپتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.