رَسانک نیوز
دوشمبه رۆچا ۲۰ پروردین ۱۴۰۳، یک جهمنندێن بلۆچے گوَستگێن رۆچا اداره اتلاهاتئے دستا بگئیر چه آمیدگسی هُکمئے پێش دارگا شستونئے شهرا آوار جنَگ بوتگ و بیست و چار ساهتا رَند آجو کنگ بوتگ.
اے بلۆچێن جهمنندئے پجّار (دانیال ملکی مهمدی [ملکزاده])، ۳۲ سالگ لال بکشئے چُکّ و پرکنتئے هلکئے مردم چه شستونئے دمگانی مردم گوَشگ بوتگ.
گوشگی اِنت که زاتی درێسێن نیروان رَند چه اشیا که دانیالِش بگئیر چه آمیدگسی هُکما آوار جتگ کساس زُهرئے ساهت سئے و نێما، گۆن بازێن زاتی پلاکێن ماشین و نزامیان پرکنتئے هلکئے سرا شستونئے دمگان اُرش برتگ و آییئے لۆگِش چُنت ساهتا بازرسی کُرتگ.
امنیتی نیروان بگئیر چه هبر و آمیدگسی هُکمئے پێش دارگا آییئے لۆگا شُتگ و رَند چه بازرسیا گاوسندوک و آییئے لۆگئے مردمانی تلپون گۆن وتِش برتگ‌اَنت.
دانیال سَرّاپی کارئے تها اِنت و آییا کْوَئیتئے جهمنندی هست و انّوگان بلۆچستانا په وتی هلکئے مردمانی چارگا آتکگ.
چه اے جهمنندئے جُرما تا انّون هچ هالے نێست.
Be the first to comment