✍🏻 ماھل بلۆچ

8 مارچ رۆچ په جَنێن چاگردا گَل و شادِھانی رۆچ اِنت بزان جنێنئے انسانی لۆٹ و واهگانی رۆچ اِنت که سالانی سال جنێنئے چاگرد گۆن مزنێن نابرابریان که چه مردسالارێن آپارتایدێن چاگردئے نێمگاه گِستا دارگ بوتگ، که وتا چۆن چه چاگرد مردسالارێن درگزا بکنت وتا برابرێن اۆبال و هُکوکان سر بکنت که آییئے هک اِنت.

جنێن چاگردئے گِستا دارگئے سئوب دراجێن سرگوست و رمِسئے هست، وڑ وڑێن درۆشمان چه مردسالارێن چاگرد نێمگا برے دین سالارێن چاگردئے نێمگا برے چه نارَهبندێن دۆد و ربێدگئے نێمگاه برے درور چه ایدولوجیکێن هکومت سرکاران دستا اێرجنگ و گِستا دارگ نێزۆر کنگ بوتگ، تان گڈسرا برے وهدا جنێن همینچُک اێر دست و پرک و پێردارگئے آماچ بوتگ که وت اے اێردستیا یکّ زاتی و کُدرتی گواچنے سرپد بوتگ که چه انسان بنگێجی رۆچان جنێن کَد کِساس هۆرد لێکگ بوتگ مردێنئے بود جێننئے اندرا نێست که گۆن مردێنا برابری بکنت. که من چه مردێنا نێزورتر آن مردێن هرچے ائے لاهک اِنت. که اے سجهێن وت اێر جنی سئوب بوتگاَنت دین و مزهب و رسم و رسومان آییئے دست اِش هم لۆک کرتگ.

همک سالا اے رۆچا 8 مارچ جنێن رۆچئے مزنداشت دارگَ بیت لۆٹ درانگاز کنگ بنت اے رۆچا کم چه کم اۆبالے که چه مرد سالارێن چاگردئے نێمگا گرَگ بوتگ، هکّ و اُبالانی پهازگئے رۆچ اِنت. جنێنا یک برابرێن اِنسانئے سرپد بئیگئے رۆچ اِنت. جَنێن و مردێنئے نیاما که بازێن هما پرک و پێر هلاس کنگئے اِنت ۔ هما پُشتا کپتگێن پِگر که په جنێنا مردسالارێن چاگردئے په زۆر منارێنگ بوتگ، هما بدێن پِگرا چه رێشگ ولگوج کنگ ببیت. جنێن پێش چه مات و گُهار گوشگ ببیت جنێن، جنێن اِنت گۆن مردێنا یک برابر لێکگ ببیت.

جنێن مات اِنت، گُهار اِنت، نِشار و جَن اِنت بله اَنگت هَر کُجا لگتمال اِنت.

بلۆچ راجدپترا جنێنان آ درۆشُما چارگَ نبیت که آ دْرۆشُما بلۆچ مردێن چارگَ بنت. منی گُشگئے مراد، منی مۆل اے نه‌اِنت که جنێن بے بستار اِنت، بله آ وڑ چارگ نبئیگ اَنت که آدگه راجانی تها گِندگَ بیت. آ جنێنان ھر پڑا مزنێن بستارے دئینت، سیاست ببیت یا تالیم، یانکه اے دگه پِڑ ببنت. باید اِنت ما دوێن آن یکێن هِسابا بچارێن و آییئے انسانی لۆٹ و گزران پێلو بکن اِێن.

چۆناها من وت یَک جنێنے آن، پمێشکا من گێشتر مار اِت کن آن که مئے چاگردئے تها جنێنانی هما لۆٹ و گرز چی اَنت که انگت نێم بُنڈَگ و ناسرجمَ اَنت. دومی اے ھبرا ھم جنێن گۆن وت مانپتاتگ که وهدے چِلّگَ بیت اگن زھگے جنکے بوت گُڑا دلا سک بژنیگ بیت زَهگ جَنکے پرچا ؟ من وتی هاوندئے درا یک بچّکے لۆٹ اِتگ ۔ اے هما وهدئے اربانی کِسّه اِنت که وهدے آیانی کِرا جِنکئِے ودی بوتگ گُڑا آ کُشگ و کَل کنگَ بوتگ، زِندگا همینچُک آیان زِد و کێنگ بوتگ گۆن جَنکێن زَهگا.

منی جُست اِش اِنت جِنک و بچکئے تها چے پرک و درکے هست اِنت؟ هما درد و رنجان که مات په بچکا کشیت هما درد و رنجان آ په جِنکا هَم کشیت. گُڑا اے تهسب پرچا؟ بچکئے لۆٹوک و چه جِنکا کُنّت؟!

بلۆچئے تها اِنچۆ سِنچ نئیاتکگ که آ جنێنئے بساتا بِزانت که جنێن په چاگردا یک گنج و هزانگئِے. اگن ما گۆن سِتک دلیا جنێنا چاگردئے بهر سرپد بوتێن و آییئے انسانی اُبالانی پێلو کنگ وتی پرز زانت گُڑا من په دلجمی گْوشان چۆ ھما دێما شُتگێن راجانی دابا بلۆچ راجا کس دێم گهبودی و دێمرئوی داشت نکنت. اگن اێرانئے چاگردا یک چمشانکے جنێنئے اۆبالا دئیگ ببیت سک شر اِنت که اێرانئے رجیم جنێنئے برابر بئیگ بستارا چینچُک المی زانت که تان انگت جنێن اێرانئے چاگردا وتی سریگ و چادرئے مستری وتی دستا نهانت په همے گونڈێن آزاتیان چینچُک تاوان داتگ تان انگت دئیگا اِنت، جنێنئے آزاتی په اێرانئے سرکارا برابر اِنت که اسلامی هکومتئے پرۆشگ مان اێرانا، بله آ که جنێنئے برابرێن هُکوکا لۆٹنت آ چه اێرانئے سرکارئے بگیر پشتا نکنزتک بلکێن رۆچ په رۆچ جهدئے و گگیری دێما کنزان بوتگ. اێرانئے همان پرۆشئے سیمسرا سر کرتگ.

گُڈسرا من همے گْوشگ لۆٹان که جنینئے کَدر کیمتا، انسانی بستارا بزان اِنت.