صبا دشتیاری ءِ رَپتن ءِروچ ءُ صبا ءِ بلوچستانیکا

✍️عبدالحلیم

یک جون بلوچی زبان ءِ نامئیں استاد، شاعرءُ ادیب واجہ صبا دشتیاری ءِ بیرانی روچ اِنت۔

واجہ صبا دشتیاری یک جون 2011 ءَ ما شال ءَ چہ تیر گواری ءَ شہید کنگ بیتگ۔ چوناہا صبا دشتیاری ءِ اصل نام غلام حسین بیتگ بلے آئی ءَ وتی قلمی پنام صبا ایر کُتگ ءُ بلوچی ءَ صبا دشتیاری ءِ نام ءَ وتی تخلیق دیما آؤرتگ اَنت۔

صبا دشتیاری ءَ وتی زَند ءَ سئے آزمانکی کتاب 1۔ ھون ءُ ھوشام 2۔ ترانگانی بُنزہ 3۔ آس ءُ آسیب۔ سئے پَٹ ءُ پُولی کتاب1۔ بلوچی زبان ءِ آکبت 2۔ بلوچی زبان ءُ لبزانک 3۔ ساچان ءُ سھاتو (سید ھاشمی ءِ باروا نبشتگیں نبشتانک)۔ دو نگدی کتاب 1۔ انگریں واھگ
2۔ گلکار ءُ چکن کار۔ یک نمدیانی کتاب “نمدیانی دروت”۔ سئے بلوچی شعری دپتر 1۔گنگدامیں سر زمین (ہائیکو ءُ ہائیکو ءِ راجدپتر) 2۔ آگہی ءِ واب 3۔ واب گندَگ لوٹیت۔ شعرانی دپتر گنگدامیں سر زمین ءُ واب گندگ لوٹیت، صبا ءِ مرگ ءَ چی پد چھاپ کنگ بوتگاں۔ اشاں چہ ابید صبا ءَ سئے اردو کتاب ھم نویستگ کہ اِشانی نام اے وڈ اَنت۔1۔ بلوچستان میں سرداری نظام (مصنف عبداللہ جان جمالدینی تدوین و ترتیب۔ صبا دشتیاری) 2۔ فلسفہ اسلام و یونان (یونانی فلسفہ) 2۔ سید ہاشمی فن اور شخصیت

صبا دشتیاری دانکہ وتی گڈی ساہ ءَ بلوچستان ءِ شاہ دربر جاہ بزاں یونیورسٹی آف بلوچستان ءَ وانینگ ءِ کار ءَ گو ہم گَرنچ بیتگ۔ صبا دشتیاری ءَ چہ اسلامیات ءَ ماسٹر کُتگ ءُ ہمے پڑ ءَ شاہ دربر جاہ ءَ وانیتگ ئے۔ صبا ءَ پہ بلوچی زبان ءُ ادب ءَ سک مہر بیتگ۔ صبا ءِ جھدانی بَرکت ءَ ملیر کراچی ءَ سید ہاشمی ریفرنس لائبریری آئی ءِ زَند ءَ اَڈ کنَگ بیتگ کہ آ مرچی ھم برجاہ اِنت۔ سید ہاشمی ریفرنس لائبریری ءَ ھزارانی کساس ءَ کتاب ایر کَنگ بیتگ کہ وانوکانی ہمک پِڑ ءَ علمی ءُ زانشتی لیول ءَ بُرز کنَگ اِنت۔

سید ہاشمی ریفرنس لائبریری صبا ءِ نیمگ ءِ پہ راج ءَ یک ٹیکی ءِ کہ اِشی ءِ بستار تا جہان اَست برجاہ بیت۔ بلے صبا ءَ وتی زند ءَ اگاں من رَد نیا یک انسائیکلوپیڈیا ءِ وڑیں چیزے بلوچستانیکاءِ نامدات ءِ سر ءَ کار بنا کُرتَگ ءَ کہ چریشی ءَ بلوچی زبان ءِ اَرزشت گیشتِر مھکم کنگ ءِ ڈبگ صبا ءَ وتی کوپگانی سَر زُرت۔ بلے وَش نیتکاں صبا موہ نہ دات کہ آ پہ بلوچاں یک نوکیں سوگات ءِ دیم بیاریت۔ اَنچوش کہ سید ظہور شاہ ہاشمی ءِ لبز بلد “سید گنج” دیم ءَ آرگ ءِ جھد کُتگ ءَ۔ سید ھم زَند ءَ موہ نہ داتگ ءَ بلے سید ہاشمی اکیڈمی باسکاں اے کار سید ءِ مَرگ ءِ پد سَرجم کُت کہ پہ بلوچی زبان ءَ بلائیں اَرزشت ءِ داریت۔

منی نِز ءَ بلوچی زبان ءِ پَٹ ءُ پولی کارانی دیما آرگ ءِ جَزبگ باز نزور اِنت۔ سید ظہورشاہ ھاشمی ءَ چی پَد انگت پہ بلوچی زبان ءُ ادب ءِ دیمرئی ءِ واست ءَ پَٹ ءُ پولکاریں جھد کنوکانی لڑ باز گیش نینت۔

صبا ءِ بلوچستانیکا بلوچی زبان ءِ واست بگندے بلائیں ٹیکی ءِ بُوتگ ءَ۔ بلے وائے قسمت کہ صبا شہید کَنگ بُوت۔ منی پِگر ہمے گُشیت کہ زبان ءُ اَدب دگہ کاراں چہ ابید پُٹ ءُ پولی کاراں چہ گیشتر دیمرئی کُرت کَنت۔

بلوچی زبان ءُ ادب ءِ دیمرئی ءِ واست ءَ بازیں ادار ءَ برجاہ اَنت۔ بائِدیں اے ادارا صبا ءِ بلوچستانیکا ءِ دیم ءِ آرگ ءِ جھد بکننت اگاں اِشی ءِ سَر ءَ کار کَنگ ممکن اِنت۔ اِش کنوگ ءَ بلوچستانیکا ءِ سر ءَ یک ٹیم ءَ کار کَنگ ءِ جھد ھم کُرتگ بلے سوبین نہ بُوتگ۔ پدا بلوچی اکیڈمی ءَ اشی سر ءَ کارکَنگ ءِ سدکی داتگ۔ اے کار کجا رَستگ؟۔ سید ہاشمی ریفرنس لائبریری کہ صبا ءِ دستانی جوڈ کُتگیں ادارا ءِ، اے ادارا صبا ءِ واباں پیلو کُت کنت یا ناں؟

وتی زبان دوستیں بامَردانی یات کَنگ ءُ آیانی ساڑایگ یک جوانیں گامگیج ءِ۔ ءُ اے ربئیت برجاہ دارگ ھژدری اِنت، چریشی ءَ پدریچ وتی زبان دوستیں بامرد ءُ آیانی کاراں چہ فراموش نہ بیت ءُ بلوچی زبان ھم دیما روت۔ بلے ہما زبان دوستیں بامرداں کہ آیاں وتی زَند ءَ پہ بلوچی ادب، زبان ءُ قوم ءَ ٹیکی دیگ ءِ جھد کُتگ انچوش کہ صبا بیتگ بلے صبا ءَ موہ نہ رَستگ۔ صبا ءِ بلوچستانیکا کجا سَر اِنت اے باروا سرپدی دیگ اَلمی اِنت۔

زبان دوستیں بامَردانی نیم بندوکیں کار اگاں دیم ءِ آرگ بہ بَنت تا اے گوڈا گیشتر اَرزشت داریت پہ بلوچی زبان ءُ ادب ءِ دیمرئی ءِ واست ءَ۔

بلوچی میزران بات۔