سید ءَ اربی ءُ پارسی چہ وتی آریپیں پت ءَ دَر برت.
نمیرانیں سید اُردو ءُ انگریزی ءَ هم زانتکار بوتگ ،
بلوچ ءِ راجدپتر شاھد اِنت کہ واجہ ءِ دل پہ ماتیں زبان ءَ پہ راج ءَ سُتکگ .
1946 ءَ کہ گوادر مشکت ءِ ایر دست ءَ اَت، واجہ ءَ انجمن اسلاہ ء بلوچاں ءِ نام ءَ گلءِ بندات ایر کُرت.
همے نیمون ءَ بلوچی دیوان ءِ بنگیج ئِے ایر کُرت.
آئی ءَ جدّ ءُ جُھد ءِ نام ءَ یک روتاکے (اخبارے) ھم شنگ کُت،
بلے مشکت ءِ اُدَھدار ءُ واگداراں واجہ ءِ اے کار دوست نہ بو ت۔۔
چیزے وهد ءَ رند سید ءِ جهدانی دیم گِرگ بوت ، انجمن پْرشت ءُ سید چہ گوادر ءَ دراں ڈیھ کنگ بوت.
سید پہ نادراھی نیمون ءَ 1949 هندوستان ءَ شُت.
کہ بلوچی زبان ءِ بارہ ءَ گیشتر پٹ ءُ پول بہ کنت .
ءُ اود ءَ واجہ ءَ پہ بلوچی زبان ءَ بازیں پٹ ءُ پولے کت۔
پد ءَ
1950 ءَ واجہ کراچی ءَ اتک، اد ءَ ریڈیو ءِ کار مستر جوڑ کنگ بوت
واجہ ءَ اے ریڈیو ءِ نیمگا بلوچ راج ءُ بلوچی زبان ءِ سک باز ھزمت کرت.
مردمے کہ لوٹ اِیت منی زبان مدام دیمتر ءَ کِنزان بہ کنت گڑا مدام ھمے ھیال ءَ بیت کہ کجام نہ کجام وڑ ءَ بلوچی زبان دیم ءَ بہ رَوت پمیشکا واجہ ءَ 1952 ءَ گوں وتی اے دگہ بلوچ دوزواھاں (بلوچی سَرچمگ) ءِ نام ءَ زبان ءِ دیمروی ءِ هاتر ءَ یک انجمنے بنگیج کُرت.
سید ءَ پہ (سَر چمگ) ءُ بلوچی زبان ءِ دیمروی ءِ هاتر ءَ بلوچستان ءِ گیشتریں هند ءُ دمگان دو ماہ ءَ پُرّیں ترّ اِت ءُ گول اِت
بلے بژن چہ وت ماں وتی ناکس ءُ نہ تپاکیاں سَر چمگ نہ سبز اِت ءُ سرچمّگ ءِ تاک لیمّراں بوت اَنت .
بلوچی زبان ءِ اے شھزانت چہ بلوچانی اے نا تپاکی ءَ دل پروش نہ بوت . واجہ ءَ گوں وتی نزوریں کوپگاں بلوچی جھد برجم داشت،
بلے
1955ءَ شومیں رنج ءِ نا دْراھی ءَ واجہ گْور جَت
گوں ھمے نادْراھی ءَ کہ واجہ ئِے روچ پہ روچ نزور کنان کُرت بلے انگت چہ بلوچ ءُ بلوچی ءَ بے هال نہ بوت مدام گوں بلوچی ءَ سَر ءُ چیر اَت.
بلوچی زبان ءِ پٹ پول ءَ بلوچستان ءِ گیشتریں هند ءُ دمگاں پاد شپاد ءَ یک یک گالوارے ءِ هاتر ءَ تَرّ اِت کہ بلوچی گوهر کیمتی لبزاں پَٹ ءُ پول بہ کنت
سید ءِ ھاشمی ءِ چہ سھجین سرجمین کاران مستریں کار بلوچی لبز بلد (ڈکشنری) “سید گنج” ءِ نبیسگ اِنت کہ بلوچی زبان ءِ اولی لبز بلد زانگ بیت.
ءُ سید ءَ بلوچی زبان ءِ سْیاھگ (رسم الخط ) ءِ بارہ ءَ ھم باز جُھد کتگ، اے بارہ ءَ سید ءَ دو جْوانیں کتاب نبشتگ یکے “بلوچی سْیاھگ ءِ راست نبیسگ” ءُ دومی بلوچی بنگیجی پہ رستگیناں”.
واجہ گْوش اِیت کہ من ءَ اے گم نہ اِنت کہ پہ منی مرگ ءَ منی چُک چورہ بنت، ھَو من ءَ اے گم ھست اِنت کہ من مُرت آں بلے پہ بلوچی ءَ ھچ نہ کت۔
4 مارچ 1978 ءَ واجہ ءَ اے کوڑھیں امروز یلہ دات، ھدا واجہ ءِ مانش ءَ روژنا کنات۔
واجہ ءِ درستی اُمر 52 سال بوتگ
انچوش مردم سرپد بیت کہ گْوش ئے زانان ھدا ءَ سید ءَ بس پہ بلوچی زبان ءِ ھاتر ءَ ودی کرتگ ات.
راجے کہ بہ بیت گنوک، نہ مان ایت نہ مان ایت.
مان ایت پہ اَدارُکے بزاں زندگ ءُ مُردار.
Be the first to comment