رَسانک نیوز

گوستگێن شپا ۲۶ پروردین ۱۴۰۳، مهریزئے ایست و بازرسیئے نزامی نیروران یزدئے تها یک بلۆچێن جهمنندے بگئیر هچ سئوبے آوار جتگ و رَند چه آییئے آزار دئیگا، دئوازده ساهتا رَند سُهبئے سرا آزاتِش کُرتگ.

اے جهمنندێن بلۆچئے پجّار (اسد نبات زهی) ۲۳ سالگ، اسلمئے چُکّ و پارۆدئے مردم چه راسکئے هلکئے نندۆکان گوَشگ بوتگ.

گۆن اے رستگێن هالا، اسد گۆن وتی یکّے چه سیادان په کار و کارگریئے درگێجگئے واستا یزدئے راها سپر کنگا بوتگ که نزامی نیروانی دستا بگئیر چه کانونی سئوبا گۆن زۆرئے سرا پیادگ کنگ و آوار جنگ بوتگ.

نزامی نیروان اَسد گۆن اے نیمّۆنا که ڈنّی مردمے آییِش آوار جتگ و یک لۆگیئے تها زندانی کُرتگ که آییئے پجاری کاٹ آییئے گۆما نبوتگ بله نزامی نیروان آییئے همراه گوَشتگ که تان سیستمانی وسل بئیگا باید بندیگ ببیت.

گوشگی اِنت که اسدئے هلکئے مردمان اسدئے پجّارئے اَکس په اسدئے همراهئے واستا راه داتگ‌اَنت و آییا هم پێش داتگ‌اَنت، مرۆچیگێن سُهبئے سرا گۆن نزامی نیروانی آیگئے گۆما بگئیر چه هچ هبریا آزاتِش کُرتگ.

اێرانئے جمهوری اسلامیئے نزامی نیروانی اے دلکَشّی و کئوم پرستی کار په بلۆچێن جهمنندانی واستا وهدے انجام بئیگا اِنت که هر سال هزاران بلۆچ گۆن اے سئوبا که بلۆچستان و سیستانئے تها گۆن بیماری و مناسبێن و همێشگی کارئے نێستیا و مناسبێن بهداشتی امکاناتئے نێستیا ناچار اَنت چۆ یزدئے اُستانا په کار و دوائے واستا سپر بکننت.