رَسانک نیوز

چارشمبه ۸ پروردین ۱۴۰۳، یک بنزینی دُکّانے سرباز و پهرهئے مزن راهئے درمئیانا، ملک آبادئے هلکا چه سرکئورئے دمگان اِنت، آس گپتگ.

اے وئیلا کَسے جانی تاوان نبوتگ بله بازێن مالی نُکسے دُکّان والایانی سرا آورتگی که اِشی آسئے هامۆش کنگئے زلوری ازباب نێستیئے سئوبا اِنت.

گوشگی اِنت که ٹێلئے کمّیئے سئوبا که اے ٹێلئے شرکت و سرڈگارئے سرمسترانی سیاستئے کارپد اِنت و هنچۆ ٹێلانی کاٹانی کُدینگ کنگئے سئوبا بازێنے چه بلۆچ جهمنندان په وتی زندئے گوازێنگئے واستا گۆن آزاتێن کیمّتئے ٹێلئے لئین و دئینئے نێمگا شتگ‌اَنت که برے بازێن هتریئے چۆ آس گِرَگ و نزامی نیروانی آزارئے دُچار بنت.

گوَشگ ببیت که ۲۰۲۳ئے سالئے جم بوتگێن هالان، کم چه کم ۳۲۱ ٹێلکش گۆن نزامی نیروانی راستێن تیرشانیان، نامالومێن سلاهبندێن مردمانی تیرگواریان، هار و آس سۆچیان ٹپّیگ و بێران کنگ بوتگ‌اَنت.