رَسانک نیوز

گوستگێن رۆچا ۲۳ اسپند ۱۴۰۲، نامالومێن سلاهبندێن مردمانی تیرگواریان بلۆچ جهمنندێئے نێمگا ناهۆکئے چار راهئے سرا شستونئے شهرئے لاپا تیرانی آماچ و هما جاگهئے سرا بێران بوتگ.

اے بلۆچئے پجّار (مهمد سدّیک [اِمران] ملک زادگ کۆهکن)، کساس ۲۴ سالگ انتی، اِیسپئے چُکّ انت و جالکئے دمگان سدّیک آبادئے هلکئے نندۆک بوتگ.

گۆن سر بوتگێن هالا، نامالومێن سلاهبندێن مردمان ناهۆکئے چارراهئے سرا، یک جهمنندێئے نێمگا اندازی بوتگ، آ گۆن تیرئے لگّگا ساه داتگ.

تان اے درگتا چه سلاهبندێن مردمانی تیرگواری و گُشئے مۆل مرادا هچ پئیمێن هالے نێست.

گۆن گوَستگێن سالئے جم بوتگێن هالان، ۲۰۲۳ئے سالا کم چه کم ۱۹۲ بلۆچێن جهمنند نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس بێران و ۴۲ کس ٹپّیگ بوتگ. آیانی تها کم چه کم پنج کسانێن چُکّ و چار زالبۆل هم هست.