رَسانک نیوز

پنجشمبه سَبا ۲۴ اسپند ۱۴۰۲، گۆن نزامی نیروانی سْراپ کنگ و تیرگواریان پنگئے مێتگا، ایست و بازرسی دێم په زهلکۆتئے راها بلۆچے و یک نزامی نیروے کُشگ و یک دگه بلۆچے و نزامی نیروے ٹپّیگ بوتگ‌اَنت.

بێران بوتگێنانی پجّار (مساپر بامری [مرادهانی])، گلام هُسئینئے چُکّ اِنت و ائیید مهمدئے برات مهروپ (ائییدُک بامری) دمگ دلگانئے شهرا چاه میرکئے هلکئے جهمنند بوتگ، ٹپیگ بوتگێنئے پجار مهمود گلزاری اِنت.

کُشگ بوتگێن نزامی نیروئے پجّار (یونس مهمدی) و ٹپّیگ بوتگێنئے پجّار (امید رزا دستجردی) که چه دست و پهلوگئے نێمگا ٹپّیگ بوتگ.

گۆن اے رستگێن هالا، یگان تکاوری ۱۱۵ ئے نزامی نیروان رند چه اِشیا که په مساپر بامریئے سْراپئے کُرتگ، پێسر چه اشی که هال دئیگ ببیت آییئے هالگێن پژو پارسئے نێمگا تیرگواری کُرتگ چه تیرگواریا مساپر بامری کُشگ و آییئے همرا رَند چه بازێن ٹپّان، نزامی نیروانی دستا آوار جنَگ و نامالومێن جاهے برگ بوتگ.

گۆن گوَستگێن سالئے جم کُرتگێن هالان، ۲۰۲۳ئے سالا، نزامی نیروانی راستێن تیرشانیان سئوب بوتگ که کم چه کم ۱۲۰ بلۆچ جهمنند بێران و ٹپّیگ بوتگ. اِشانی تها ۸۰ کسا بێران و ۴۰ کس ٹپّیگ بوتگ که اِشانی تها ۹ کسانێن چُکّ و ۳ جنێن هم هست.