رَسانک نیوز

جُمَهئے رۆچا ۲۷ بهمن ۱۴۰۲، مئولوی اَبدُلهمید اسماێل زهی، دُزآپئے نماز جمهئے کتبهئے هبرانی تها شورا نگهپانی چَکّاستگ و چه اێرانئے دُزّیانے که بوتگ‌اَنت زهرشانی کُرتگ.

مئولوی اَبدُلهمیدا گوشت: چۆ بوتێن که اَلّمی کنگئے کانون و اَنجار، انّوگێن وهدا په گپ و هبرئے سرا برگ بوتێن. رییس جمهوریئے و مجلسئے گچێنیئے لاهکی، لهتێن جُنز و شورا نگهپانئے دستا دئیگ بوتگ که شورا نگهپان سکّێن گرانێن زلورت و شَرت اێر کُرتگ. چه زلورتے هست که اگن یکّے بلۆٹیت رییس جمهور یا مجلسئے نماینده و استاندار و مدیر کل ببیت (اسلامئے اَملی لازم گِرگ) یکّے چه زلورتان ببیت؟ زانان ما لۆٹێن په یک مسیتیئے واستا پێش نمازے اێر بکنێن که (اسلامئے اَملی لازمیئے گِرگا) یکّے چه زلورتان بگوشێن؟

مئولوی اَبدالهمیدا ادامه دات: زانان اے مزنێن دُزّی همے مردمانی دستا کنگ نبوتگ‌اَنت که شمئے نهادان اے چه وتی ساپی کنۆکا رَد کُرتگ‌اَنت و آیانی گچێنی اَلّمی کُرتگ؟ هما مدیرے که هُشترا وت و بارا بارت اے هما اِنت که شما گچێن کُرتگ و گوشتگۆ که اِشی هما اِنت ولایت پگیهئے و اسلامئے اَملی دینئے سرا پابند اِنت. مرۆچی پساد هلکئے تها انچۆ آم اِنت که هچ کسا آییئے دێمگیریئے مۆکه و کُدرت نێست. مردم اے اَنجاما رستگ‌اَنت که دئولت و اُگدهدار پسادئے دێمگیریا کُرت نکننت.

دُزآپئے جمهئے پێش نمازا گوشت: اپسۆزئے جاه اِنت که مردمانی هچ هبرے گۆش کنگ نبوتگ. اے مردم هلکئے دلسۆچ و هئیر لۆٹ اَنت. اێرانی مردێن و جنێن اسلامئے دۆست دار اَنت و دینئے سرا اهترام اێر کننت و وتی هلکئے سرڈگار دۆستِش بیت. اگن همے مردمانی هبر گۆش کنگ بوتێن سرڈگارئے هئیر همشیئے تها اَت.

مئولوی اَبدلهمیدا گوشت: تان وهدے گه سرڈگارئے تها دگری مئیئیت مشکل اڈ نبنت و مردمانی رِزا دستا نئیئیت. اگه دگری سرڈگارئے تها بیاتکێن و اگن همے سیاست که بن بستا رستگ‌اَنت بدل بوتێننت مرۆچی مردمان روهیه هست‌اَت و شمئے تئوارِش پسئو دات و مئیدانئے تها آتکنت، هما وڑا که اے چل و چنت سالا مئیدانئے تها آتکگ‌اَنت.

آییا گوشت: من هرابێن گپ نکنان، بلکێن اشی هکیکتے که مرۆچی مردمان وتی روهیه چه دستا داتگ. چیا هما که چه زیگا وتی آستیگِش بُرزا جتگ و مئیدانئے تها آتکگ‌اَنت مرۆچی وتی لۆگا نشتگ و هچ کارے نکننت؟ سئوبی اشی اِنت که مردمان هچ روهیهے نێست و اهساس کننت که وسرێن کارے که مدام کنگ بئیگا اِنت.