رَسانک نیوز

۱۴۰۲ئے بهمنئے ائولی هپتگا، دوازده بلۆچ مان چه کُنرکئے شهرا، آزاتێن آپانی تها آپریکایئے نزیکیان سۆمالیئے زِری دُزّانی دستا آوارا جنَگ بوتگ‌اَنت که یکّے چه اے ماهیگران گۆن زِری دُزّانی تیرگواریا بێران کنگ بوتگ.

بێران بوتگێن بلۆچئے پجّار “جمشید بردی”، ۱۹ سالی بوتگ، کاسمئے چُکّ و سئے کس چه آوار جتگێن ماهیگرانی پجّار «مُهتار بردی»، ۱۷ سالگ انتی، واهدئے چُکّ، «اسلم بردی»، ۲۴ سالگ انتی، نورمهمدئے چُکّ، سور کُرتگێن و یک چکیئے پت، «زَکریا بردی»، ۲۰ سالگ انتی، نورمهمدئے چُکّ، پارگئے مردم انت نزیک کُنرکئے شهرا نشتگ.

گۆن اے رستگێن هالا، اے نام گپتگێن کس په ماهیگئے گرگا آزاتێن زرئے آپان شُتگ‌اَنت که سۆمالیئے زری دُزانی دستا آوار جنَگ بوتگ و تیرگواری که بوتگ‌اَنت یک کسے بێران بوتگ و چه یازدهێان انگت هچ هال و هبرے نێست.

گوشگی اِنت گۆن اێران و چینئے ۲۵ سالیگێن کرار دادا و اجازت نامهئے ندئیگ چه چهبارئے اداره شیلاتئے نێمگا په ماهیگران، ماهیگر په ماهیگئے کرگا ناچار اَنت دورێن زران برئونت که اۆدان گۆن بازێنے چه جێڑان چۆکه مزنێن توپان و زری دُزّان دێم په دێم بنت.

گوشگی اِنت که پێسرا هم ۴۰ بلۆچ ماهیگر کُنرک و چهبارئے دو لانچئے جانشو گۆن سئیادی اجازت نامها که سۆمالیئے آپانی تها په ماهیگئے سئید کنگا شُتگ بوتگ‌اَنت که هما مُلکئے زِری گاردئے دستا آوار جنَگ بوتگ و انگت رند چه ده سالئے گوزگا که شکنجهئے چێرا و بدترێن هالتیا دارگ بوتگ‌اَنت که هر نپرے دوازده هزار دلار چه سۆمالیئے آمیدگسئے نێمگا جریمه بوتگ‌اَنت و تا انّون هچکس اێرانئے اُگدهداران چه اے بلۆچ جانشوانی هالا مۆکک و درگزا هچ کارے نکُرتگ.