بیرجندئے زندانا هر رۆچ اێدامئے سزا گێش بئیان اَنت کم چه کم چار کس اێدام بوتگ چه اشانی تها سئے کس بلۆچ هئوار بوتگ

رَسانک نیوز

چارشمبهئے بانگواها ۶ دی ماه ۱۴۰۲، کم چه کم چار کس اێدام بوتگ که چه اِشانا سئے کس بلۆچ و یکّ کُردے هئوار بوتگ‌ رَند چه اشیا که تنکێن بندیگا برگ بوتگ‌اَنت بگئیر چه آیانی کهۆلانی سرپد و هال دئیگا اێدامئے هُکم انجام دئیگ بوتگ.

اے سئیێن بلۆچ بندیگانی پجّار “اسماێل کادر مکام (براهویی)”، ۳۲ سالگ، سئیید مهمدئے چُکّ اِنت، اسلا دزاَپئے مردم اِنت و بیرجندا نندۆک بوتگ، “اهمد گرگێج”، کساس ۳۰ سال انت، سور نکرتگێنے و زابلئے نندۆک بوتگ، “مهمد هساری”، ۵۵ سالگ و سور کُرتگێن و دو چُکّئے پت و کرمانشاهئے نندۆک گوشگ بوتگ.

گۆن هال وشّ ائے رستگێن هالا، چه آ دگه یکێن بلۆچ بندیگ که مئوادئے جُرما اێدام بوتگ و دُزآپئے مردم اِنت و تنیگا انگت هچ هالے چه آییئے پجّارا نێست.

رستگێن هالانی ردا، اسماێل ۱۳۹۸ئے سالا، گۆن مئوادئے جُرما نهبندانئے تها آوار جنگ بوتگ و بیرجندئے انکلابئے آمیدگسا اێدامئے هُکما مهکوم کنگ بوتگ.

انچۆ “اهمد گرگێج” کساس چار سال پێش مئوادئے جُرما بیرجندئے تها آوار جنگ بوتگ.

دگه یک زندانیے “مهمد هساری” نامے، ۱۳۹۸ئے سالا سهل آبادئے بازرسیئے سرا گۆن مئوادئے جُرما دزگیر کنگ بوتگ و بیرجندئے بندیگا برگ بوتگ و چه اے شهرئے انکلابئے آمیدگسا، ۱۴۰۰ئے سالا اێدامئے هُکما مهکوم کنگ بوتگ.

گوشگی اِنت که آیانی کهولانی مردم رَند چه اشیا که یک بندیگیا آیانی کهۆلانی سرا زنگ جتگ و هالی داتگ بیرجندئے بندیگا آتکگ‌اَنت بله بندیگئے اُگدهداران، آیانی کهۆلانی مردم، پێش چه اێداما آیان کهۆل په گڈسری سری گِندوگدارا مۆکل دئیگ نبوتگاَنت.