رَسانک نیوز، گۆن هکومت و دئولتئے اُگدَهدارانی بێپگریا بلۆچستانئے تها، بێکرداریئے درۆشما سۆهتئے (سوخت) یارانهی شِنگ کنگ اُستانئے تها و گریبانی بهرئے ندئیگا، سئوب بوتگ که بَدیئے سرا کارمرز ببیت و سوخت کاچاک ببیت و لهتێن دمگان گازْ کپسولئے کیمّت چارسد هزار تُمنا رستگ.

اے چُش اِنت که کمتر چه ده درسدئے مردمان شهری گازِش هست چۆ که بلۆچستانئے مرکزا، دزآپئے شهرا گێشترێن مردم چه کپسولی گازان کارمرز کننت.

بلۆچستان و سیستانئے گێشترێن جهمنندێن و کار زانتێن مردم اے بائورئے سرا اَنت، گۆن اے چمشانکا که کیمّتئے بُرزی گۆن سرمسترانی بێپگر و بێهئالیئے سرا، دادستان کُل، آمێن لۆٹئے بُنّامیئے (عنوان) گۆما اے کارئے تها بیئیت و وتی زۆرا پێش بداریت.

گوشگی اِنت شهری گازئے رسێنگئے گْوارچا (پوشش) په زِبهرێن دمگان،‏ هر هلکے زابل و چهبار و زاهدانئے شهران و دمگان یک بهرے رسیتِش، بله اے بهر هلکئے لۆگانی هرچئے سرا بس نکنت و اے بُنگپ په آ هلکانے که اێرانئے پجّارئے کاٹِش نێست چُنت برابر مشکلِش گێشتر اِنت.

انچۆ هم،‏ گۆن گازئے و نانواییانی دو کیمّتی بئیگئے سئوبا، مردم سک مشکلانی تها اَنت.

گۆن آ چیزّے که (شرکت ملی پخش فراورده های نفتی) زاهدانئے تها اێلام کُرتگ، آپێن گازئے شِنگ کنگ په آ کسانے که شهری گازِش نێست یارانهی کیمّتئے سرا شِنگ ببیت. اے پئیسلهئے سئوبا آپێن گازئے کیمّت بُرزتر شُتگ و مردمانی سرا مزنێن بارے بوتگ. چُش اِنت که سرمستر اے پئیسلهئے اَسرا کمتر گندنت بله هکیکت اِشیا پێش داریت که اے بُنگپ زِبهرێن هلکانی سرا گێشتر اَسر کنت.