درَدیں ھون ءِ رگام ھر روچ جن اَنت جوش
مُدام گوں ھون ءِ نوکاپ ءَ شل اَنت اَرس
وتن سالونکیں ھر شپ بیت کپن پوش
نہ منتگ دز گُھاریں میتگ ءَ کس
بہ دار اِیت چورہ اِیں زرد ءَ مے دلگوش
شپ ءَ مان پوش اِتگ کور آسیں ھر دیم
کدی رژن ءِ چراگ آزمان ءَ کنت گوش
نہ ماراں کاپریں درداں دل ءَ من
نہ باں سالونکیں لاشاں من پراموش
نوں بس اِنت سر شکینی چو بگای ءَ
بہ کن تَوکَل گلامی سنکلاں پروش
چو بالاچ ءَ کپن ھیسی سر ءَ بند
پہ ھک ءَ موت ءِ زھریں کُچلاں نوش
بلوچستاں بلوچانی زمین اِنت
لگوراں پرّ اِتگ بلکیں شمے ھوش
بلوچستاں بلوچستان ء مان اِیت
پہ جنگ ءُ جُڈ بہ بیت یا ھون ءُ یا کوش
دل ءَ سابون مہ جن پہ مئے زمین ءَ
آ واب کہ دیتہ تو ھچبر نہ بیت چوش
تو کُھگرد سر مچارانی رد ءَ کپ
کہ جھل بنت دژمنانی گردن ءُ گوش…
یھیا آسکانی
Be the first to comment