پهرہ ءَ چُنت ھمسایگانے اَڑ ءُ جیڑ ءَ دو جنیں آدمئے ھوری ءَ سئے بلوچ کُشگ ءُ ٹپّیگ بوتگ/ دو مردم دزگیر بوتگ

رَسانک نیوز/ جمے 27 شهریور ماہ 1405، پهرہ ئے مولوی 10 ئے روڈ ءَ چُنت ھمسایگانے دپ جنگی ءُ جیڑہ گوں تیرگواری ءَ آسر بوتگ. اے تیرگواری ءَ یک مردینی کُشگ، دو جنیں آدم ٹپّیگ ءُ دو مردما نزامی ٹولییا دزگیر کرتگ.

رَسانک ءَ کُشگ بوتگیں بلوچئے پجّار «مهمد نارویی»، کِساس 24 سالگ، ھسن ئے چُک، ٹپّیگ بوتگیں جهمنندانی پَجّار «جانی میدانی»، ءُ «نجمه میدانی»، سجّهیں پهرہ ئے نندوک ءُ دزگیر بوتگیں دو بلوچئے پجّار «نیازپتهی رئیسی»، ءُ آییئے چُک «پرشید رئیسی»، زانتگ.

رَسانک ءِ ھال سرکنوکانی رِد ءَ، ٹکّر چُنت ھمسایگانے میان ءَ دپ جنگی ءَ گوں بُنگیج ءُ گوں تیرگواری ءَ آسر بوتگ. اے تیرگواری ءَ سئے مردم ءَ تیر وارتگ ءُ ٹپّیگ بوتگ اَنت. «نجمه میدانی» ئے ھالت نگیگ گوَشگ بوتگ ءُ آیی ماں گیشیں چار ءُ بچار ئے بهر ءَ بستری اِنت.

ھمے وڑا مهمد نارویی ھال سرکنوکانی رِد ءَ، چه نازانتی ءُ رَدیا تیر وارتگ ءُ ساھی داتگ.

رَسانک ءِ ھال سرکنوکانی رِد ءَ، نیاز پتهی رئیسی ءُ آییئے چُک پرشید رئیسی، پد چه ٹکّر ئے بنگیج بوھگ ءَ په میانجی‌گری ءُ سلاھکاری ءَ جاھا شُتگ اَنت ءُ آیان ءَ ماں اے ٹکّر ءَ ھچ پئیمیں بهرے نه بوتگ، بله پدا ھم نزامی ٹولییا دزگیر کرتگ اَنت.

داں انگتا ٹکّر ئے بنگیج بوھگئے بارئوا گیشتریں ھالے دست نه کپتگ ءُ نه که تیرگواری کنوکیں مردمانی پجّار زانگ بوتگ ءُ نه که دزگیر بوتگیں مردمانی پرمندھئے جاور زانگ بوتگ. گوں ھالئے سرجم بوھگ ءَ گیشتریں بهر شِنگ بنت.