سب ءُ سوران ءَ سلاہ بندیں دُزّانی تیرگواری ءَ بلوچے کُشگ بوتگ

رَسانک نیوز/ یکشمبے 1 شهریور ماہ 1405، سب ءُ سوران ءِ کهن ملک دمگ ءَ سلاہ بندیں دُزّاں بلوچییے گُد دوچگئے دکان ءِ سرا اُرش ءُ تیرگواری کرتگ، اے تیرگواری ءَ آییا تیر وارتگ ءُ ساہ داتگ.

رَسانک اے بلوچئے پجّار «مهمدانور شهدادزھی»، کِساس 40 سالگ، ھُدابکش ئے چُک، سب ءُ سوران ءَ کهن ملک دمگئے نندوک زانتگ.

رَسانک ءِ ھال سرکنوکانی رِد ءَ، سلاہ بندیں دُزاں کہ سواری گاڑی ءَ نندوک بوتگ اَنت مهمدانور ئے دکانئے سرا اُرش ءُ تیرگواری کرتگ، اے تیرگواری ءَ آییا تیر وارتگ ءُ سکّ ءَ ٹپّیگ بوتگ. مهمدانور ءَ چہ ٹپّانی باز بوھگ ءَ ساہ داتگ.

ھال سرکنوکان ءَ گوَشتگ زی بیگاھئے ساھت 19 ءِ وھدا کهن ملک ءَ آییئے بے ساھیں جون مانش ءَ ائیر دیئگ بوتگ. نماز جنازہ ءَ دمگئے نندوکیں مردمان ءَ بهر زورتگ.