شستون ءَ سلاہ بندیں مردمانی، لوگئے دیما تیرگواری ءَ جنیں آدمئے ھوری ءَ سئے بلوچ کُشگ ءُ ٹپّیگ بوتگ

رَسانک نیوز/ دوشمبے 8 تیر ماہ 1405، شستون ئے دزک دمگ ءَ سلاہ بندین ءُ بے پجّاریں مردمانی پُرّیگیں لوگئے دیما تیرگواری ءَ یک بلوچی کُشگ ءُ جنیں آدمئے ھوری ءَ دو دگہ بلوچ ٹپّیگ ءُ پہ درمان ءَ نادراہجاہ ءَ سرکنگ بوتگ اَنت.

رَسانک ءَ کُشگ بوتگیں بلوچئے پجّار «یوسپ سوریزھی»، کِساس 20 سالگ ءُ دویں ٹپّیگ بوتگیں بلوچانی پجّار «جنگی ھان سوریزھی»، کِساس 40 سالگ، ھر دو ھان‌مهمد ئے چُک، آروس کرتگ ءُ سئے زھگئے پت، آییئے لوگی «سکینہ سوریزھی»، سجّهیں بُندر ءَ واش ئے نندوک ءُ شستون ءَ دزک دمگئے جهمنند زانتگ.

رَسانک ءِ ھال سرکنوکانی رِد ءَ، سلاہ بندیں مردماں اے ھاندانئے لوگئے دیم ءَ تیرگواری کرتگ، اے تیرگواری ءَ یوسپ ءَ تیر وارتگ ءُ ساہ داتگ۔ آییئے برات جنگی ھان وتی لوگی «سکینہ سوریزھی» ءَ ھور تیر وارتگ ءُ ٹپّیگ بوتگ، کہ پہ درمان ءَ نادراہجاہ ءَ سر کنگ بوتگ اَنت۔ گوَشنت جنگی ھان ئے ھالت سکّ ءَ نگیگ اِنت.

ھال سرکنوکان ءَ گوَشتگ گوں اشیا کہ چُنت شپ ءَ پیش واش ءُ شستون ئے راہ ءَ اے ھاندان ءُ لهتیں دگہ مردمانی میان ءَ جیڑھی پیش آتکگ، سیاد ءُ نزّیکیں مردمانی گُمان ءَ اے تیرگواری ءَ ھمیں مردمان ءَ کرتگ.

داں انگت ءَ گوں اشیا کہ رَسانک گُمانداریں مردمانی پجّار ءَ کہ بیت کنت اے تیرگواری ءَ ھور بوتگ اَنت زانت، بلے چہ وت نہ توانت اے گپّ ءَ تسدیگ بکنت.