زِرباریں رودبار ئے اسلام‌آباد ءَ جُست پُرسی ادارہ ءَ لوگییے سرا اُرش ءَ پد، بلوچیں جنیں آدمی ءَ گوں آییئے یک سالگیں چُکّ ءَ ھور دزگیر کرتگ

رَسانک نیوز/ شمبے روچ 30 ھُرداد ماہ 1405، زِرباریں رودبار ئے اسلام‌آباد دمگ ءَ جُست پُرسی پلیس ئے ٹولی ءَ بلوچییے لوگئے سرا اُرش کرتگ ءُ چہ اشیا کہ مردمئے جند لوگ ءَ نہ بوتگ ءُ آیانی دست ءَ نہ کپتگ، پلیس ءَ آییئے لوگی ءَ گوں یک سالگیں چکئے ھوری ءَ دزگیر کرتگ ءُ گوں وت برتگ.

اے بلوچیں جنیں آدمئے پجّار «کبرا نارویی»، 37 سالگ، رزا ئے چُک ءُ آییئے ھُردیں چُک «سامان نارویی»، یک سالگ، مهمود ئے چُک، زِرباریں رودبار ئے اسلام‌آباد ءَ ھیدرآباد دمگئے نندوگ گوَشگ بوتگ.

اے ھالئے رِد ءَ، جُست پُرس کنوکیں پلیس ءِ ٹولییا پہ «مهمود نارویی»، گلام ھسین ئے چُک ئے دزگیر کنگ ءَ لوگ ءَ شُتگ اَنت، بلے آ وھدا آییئے جِند لوگ ءَ نہ بوتگ ءُ بس آییئے لوگی ءُ ھُردیں چُکّی لوگ ءَ بوتگ اَنت.

پد چہ اشیا کہ نزامی ٹولی پہ مهمد ئے دزگیر کنگ ءَ سئوبین نہ بوتگ، آییئے لوگی ءُ ھُردیں چُکّ ءَ دزگیرش کرتگ ءُ گوں وت ءَ جُست ءُ پُرسی ادارہ ءَ بُرتگ۔ ھاندان ءُ سیادان ءَ گوَشتگ جنیں آدم ءُ ھُردیں چُکّ ءَ ھچ بهری ماں مهمود ئے سرا جتگیں پرمندہ ءَ نہ بوتگ ءُ نزامی ٹولییا پہ مهمود ئے زور کنگ ءَ کہ وت ءَ آیانی دست ءَ بدئنت، اے کارِش کرتگ۔ ھاندان ءُ لوگئے مردمان ءَ پہ اے جنیں آدم ءُ ھُردیں چُکّئے دزگیر کنگ ءَ وتی دل پریشانی درشان کرتگ.