(هُشدار: ویدئوا دلپدرێن اَکس مان اِنت)

رَسانک نیوز

سئےشمبه شپا ۳۰ مرداد ۱۴۰۳، بلۆچے بکشانئے هلکا شستونا سلاهبندێن مردمانی تیرانی آماچ بوتگ و گۆن تیرئے ورگا سکّ ٹپّیگ بوتگ و شتستونا رازیئے نادراهجاها برگ بوتگ.

اے جهمنندێن بلۆچئے پجّار (سابر دهواری)، ۱۸ سالگ، بکشانئے مردم چه شستونئے دمگان گوَشگ بوتگ.

همے هالانی رِدا، اے وئیل کساس شپئے ساهت ده و نێما پێش آتکگ و سلاهبندێن مردمان که یک ماشینیئے نندۆک بوتگ‌اَنت، سابر و آییئے دگه کسے که سابرئے همراه بوتگ‌ بکشانئے هلکا وانگجاهئے پُشتا تیرانی آماچ کرتگ‌اَنت.

گوَشگ بیت که سابر رَند چه ٹپّیگ بئیگا و جهمنندێن مردمان اورژانسئے سرا پئون کُرتگ و نادراهجاها برگ بوتگ و نادراهجاهئے آی سی یوئے تها گۆن رێهۆشی درۆشما درمان کنگ بوتگ.

چه جنۆکانی جنَگئے سئوبا و آبانی پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.