رَسانک نیوز

رند چه هکوک و بیمهئے ندئیگ و انچُش جاورئے بدل نکنگا، بازێنے چه (خرید خدمات)ێن اُستادان که چه ۱۸ آزر ۱۴۰۲ اۆشتِش کُرتگ و وتی کلاسانی سرا نشُتگ‌اَنت، زانگ و رُدگئے دپترئے سرمستر و هراستئے نێمگا بیم و پاتراپ کنگ بوتگ‌اَنت.

اے رَستگێن هالانی رِدا، اے ادارهئے سرمستر و هراستا، اے اُستاد په اخراج و آیانی کارئے ابلاگئے تئوام کنگ و آیانی دئور دئیگ دورێن و سیمسری جاهان تهدید کُرتگ و بگئیر چه اشیا که گوَشگ بوتگ‌اَنت که کلاسانی سرا برئونت گوَشتگِش که وتی اۆشتا یله کنێت.

گوشگی اِنت بازێنے چه اے اُستادان گوستگێن رۆچا ۲۰ آزر ماه پرمانداریئے دپا اۆشتاتگ‌اَنت و وتی هکّئے لۆٹۆک بوتگ‌اَنت.

گوشگی اِنت که کَم چه کَم ۶۰۰ خرید خدماتێن اُستاد راسکئے زانگ و رُدگئے ادارهئے تها کار کنگ و درس دئیگا اَنت که چه هر وڑێن هکّ و هکوکا بێبهر اَنت.

خرید خدماتێن اُستاد کساس ۹ سال اِنت که گۆن اُگدهدارانی کئول و تهدیدانی سرا زبهر اَنت و هچ وڑێن کارے په آیانی کار و زندگیئے پکّایئے واستا گِرَگ نبوتگ.

همے وڑا اے گوَستگێن سالان په اے اُستادان هچ بیمهئے هکّے رَد کنگ نبوتگ و انچۆ گوَستگێن سالئے هکوک آیانا دئیگ نبوتگ.

گوشگ ببیت که گۆن اُستادانی اے اۆشتا، سئوب بوتگ که بازێنے چه کلاسان چۆ بنت و آشار و دشتیاری و راسکئے دمگان بند و چُٹّی ببنت.