8مارچ جَنێنانی مْیان اُستمانی رۆچ مراد بات

✍🏻ماھل بلۆچ

  8مارچ رۆچ په جَنێنا گَل و شادھانی رۆچ اِنت بزان جنێنئے انسانی لۆٹ و گرز،  هکّ و اُبالانی پهازگئے رۆچ اِنت. جنێنا یک برابرێن اِنسانے سرپد بئیگ ءِ رۆچ اِنت. جَنێن و مردێنئے تها هما پَرک که لهتێن  مردُمان داشتگ هما پرک و درکئے هلاس کنگئے رۆچ اِنت ۔ هما بدێن پِگر ۆ سۆچ که په جنێنا  هَرکسّی  زِهێن تها نشتگ و مانگێجگ بوتگ ، هما بدێن پِگرا چه ونڈالان ولگوج کنگئے رۆچ اِنت. هَر جنێنا وتی مات و گُهار لیکگئے رۆچ اِنت. جنێن مات اِنت ،گُهار اِنت، نِشار و جَن اِنت بله اَنگت  هَر کُجا لگتمال اِنت.

 بلۆچ راجدپترا جنێنان آ درۆشُما چارگَ نبیت که آ دْرۆشُما بلۆچ مردێن چارگَ بنت. منی گُشگئے متلب، منی مۆل اے نه‌اِنت که جنێن بے بستار اِنت، بله آ وڑ چارگ نبئیگ اَنت که آدگه راجانی تها گِندگَ بیت. آ جنێنان ھر پڑا مزنێن بستارے دئینت، سیاست ببیت یا تالیم، یانکه اے دگه پِڑ  ببنت. باید اِنت ما دوێن آن  یکێن هِسابا بچارێن و آییئے انسانی لۆٹ و گزران پێلو بکن اِێن.

چۆناها من وت یَک جنێنے آن، پمێشکا من گێشتر مار اِت کن آن  که مئے چاگردئے تها جنێنانی هما لۆٹ و گرز چی اَنت که انگت نێم بُنڈَگ و ناسرجمَ اَنت. دومی اے ھبرا ھم جنێن گۆن وت مانپتاتگ که  وهدے چِلّگَ بیت  اگن زھگے جنکے بوت گُڑا دلا سک بژنیگ بیت زَهگ جَنکے  پرچا ؟ من وتی هاوندئے درا یک بچّکے لۆٹ اِتگ ۔ اے هما وهدئے اربانی کِسّه اِنت که وهدے  آیانی کِرا جِنکئِے ودی بوتگ گُڑا  آ کُشگ و کَل کنگَ بوتگ ، زِندگا همینچُک آیان زِد و کێنگ بوتگ گۆن جَنکێن زَهگا.

منی جُست اِش اِنت جِنک و بچکئے تها چے پرک و درکے هست اِنت؟ هما درد و رنجان که مات په بچکا کشیت هما درد و رنجان آ په جِنکا هَم کشیت. گُڑا اے تهسب پرچا؟ بچکئے لۆٹوک و چه جِنکا کُنّت؟!

بلۆچئے تها اِنچۆ سِنچ نئیاتکگ که آ جنێنئے بساتا بِزانت که  جنێن په چاگردا یک گنج و هزانگئِے. اگن ما گۆن سِتک دلیا جنێنا چاگردئے بهر سرپد بوتێن و آییئے انسانی اُبالانی پێلو کنگ وتی پرز زانت گُڑا من په دلجمی گْوشان چۆ ھما دێما شُتگێن راجانی دابا بلۆچ راجا کس دێم گهبودی و دێمروی داشت نکنت.

گُڈسرا من همے گْوشگ لۆٹان که جنینئے کَدر کیمتا ، انسانی بستارا بزان اِنت.

Be the first to comment

Leave a Reply

Your email address will not be published.


*