راسک ءِ جکیگور ءَ سلاہ‌بندیں اُرش ءَ یک سادہ پوشیں نزامی یے کُشگ ءُ دو دگه ٹپّیگ بوتگ

رَسانک نیوز/ دوشمبے 13 مهر ماہ 1405 ءِ شپ ءَ، راسک ءَ جکیگور ئے پُہل ءَ پژو 207 گاڑی یے که سئے سادہ پوشیں نزامی نندوک بوتگ تیرگواری ئے دپ ءَ کپتگ، اے تیرگواری ءَ یکے چه گاڑی ئے نندوکاں کُشگ ءُ دو دگه ٹپّیگ بوتگ.

رَسانک ءَ کُشگ بوتگیں نزامی کارمند ئے پجّار «مرتزا بزی» ءُ ٹپّیگ بوتگیں دوئیں کارمندانی پجّار «مرتزا سیادی»، «ھامد سیادی»، ھر سئے زابل ئے نندوک زانتگ.

تیرگواری ءَ رَند اے کارمنداں راسک ءِ نادراہجاہ ءَ سرکنگ بوتگ اَنت که یکے چه آیاں ساہ داتگ ءُ دو دگه درمان بوھگ اَنت.

رَسانک ءِ ھال سرکنوکانی رِد ءَ، اے نزامیاں چه جکیگور ئے سیمسراں چاروگیں باسک ئے کارمنداں بوتگ اَنت که گوں زاتی گاڑی ءُ سلاہ ءَ جکیگور ءُ راسک ئے راه ءَ روگ ءَ بوتگ اَنت. سپاھئے ایردستیں میڈیا ءَ داواہ کرتگ اے گاڑی ئے نندوکاں چه ریمدان ئے سیمسر ئے ڈریوراں بوتگ اَنت. بله ھال سرکنوکان ءَ گوَشتگ: اے مردماں جکیگور ئے سیمسراں چاروگیں باسک ئے کارمند بوتگ اَنت که شپ ءَ ماں اے راه ءَ روگ ءَ بوتگ اَنت.