راسک ءَ نزامی ٹولییا گوں ٹکّر ءَ کُشگ بوتگیں راجی پدائیانی سنگر ئے پدائی یے پَجّار زانگ بوتگ

رَسانک نیوز/ دوشمبے 13 مهر ماہ 1405، راسک ءِ بیدلد ءُ شوشگیم ئے کوھستگ ءَ راجی پدائیانی ءُ ایرانی نزامیان ئے میان ءَ ٹکّر ءَ کُشگ بوتگیں پدائی یے پَجّار زانگ بوتگ.

رَسانک ءَ اے بلوچئے پجّار «ابوزر ھملی»، کِساس 23 سالگ، ابدلهلیم ئے چُک، سرباز ئے نسکنت ءَ آبچکی دمگئے نندوک زانتگ.

اے ٹکّر جمے روچ 10 مهر ماہ ءَ سباھئے ساھت 5:30 ئے وھدا بُنگیج ءُ داں بیگاھئے ساھت 15:20 ءَ برجاه بوتگ. اے ٹکّر ءَ دمگ ءَ زوریں تیرگواری ءُ تراکے توار اِشکنگ بوتگ.

سپاھئے زمینی لشکر ئے کُدس بُنجاه ئے جارتاک ءَ گوشگ بوتگ اے ٹکّر ءَ دو سلاہ‌بندیں مردم کُشگ ءُ بازینی دگه چه دمگ ءَ تاچینگ بوتگ. چه دگه نیمگے راجی پدائیانی گل ءَ وتی جارتاک ءَ گوشتگ: ایران ئے نزامی ٹولی ءَ چه گِه، کسرکند، راسک ءُ سرباز ءَ وتی کارندگ نئز آورتگ ءُ گوں ٹوپ ءُ جنگی ساز ءُ سامان، بے نندوکیں بالیگراباں اے گل ئے پدائیانی بُنجاھئے سرا ماں پارود ئے کوھستگ ءَ اُرش کرتگ. گل ءَ گوشتگ: گوں ٹکّر ئے آسر بوھگ ءَ 15 پدایی په کوہ ءَ پدترّگ ءَ سوبیں بوتگ اَنت.

گوشگ لوٹیت: که «ابدلهلیم ھملی»، ابوزر ئے پت ھم پیشترا ماں تاریک 21 اردیبهشت ماہ 1405 ءَ پهرہ ئے سرکهوران دمگ ءَ سئے بلوچ ئے ھوری ءَ که آیانی نام «ناسر ھملی، ماجد ھملی ءُ منسور جمالی» بوتگ، پهرہ ئے چیریں ادارھئے تیرگواری ئے دپ ءَ کپتگ ءُ کُشگ بوتگ اَنت. گاڑییے که اے چاریں بلوچ نندوک بوتگ اَنت چه تیرگواری ءَ بُن گپتگ ءُ آیانی بے ساھیں جون ماں آس ءَ سُهتگ اَنت.