شستون ءَ بکشان ئے ٹکّر ءَ یکے چه کُشگ بوتگینانی برات دزگیر کنگ بوتگ، سئے روچ اِنت که بے ھالے سرپدئے اِنت

رَسانک نیوز/ سئے شمبے روچ 7 مهر ماہ 1405، «مبین شادزھی»، یکے چه «راجی پداییانی سنگر» ئے پداییاں بوتگ ءُ ماں بکشان ئے 21 شهریور ماہ ئے ٹکّر ءَ کُشگ بوتگ، آییئے برات ءَ امنیتی ٹولییا چه شستون ئے گپورآباد ءَ دزگیر کرتگ ءُ گوں اشیا که سئے روچ چه دزگیر بوھگ ءَ گوَستگ داں انگت ءَ لوگئے مردمان ءَ آییئے ھچ پئیمیں ھالے سرپدئے دست نه کپتگ.

دزگیر کنگ بوتگیں بلوچئے پجّار «ایسا شادزھی»، کِساس 29 سالگ، مهمدایوب ئے چُک، شستون ئے نندوک زانگ بوتگ.

اے ھالئے رِد ءَ، ایسا شادزھی رَند چه اشیا که آییئے برات کُشگ بوتگ امنیتی ءُ نزامی ٹولی ءَ دزگیر کرتگ ءُ چه دزگیر بوھگ ءَ بگر تانکه اے وھدا لوگئے مردمان ءَ آییئے ھچ پئیمیں ھالے دست نه کپتگ.

چه یک نیمگے، مبین شادزھی ئے بے ساھیں جون که 21 شهریور ماہ ءَ گوں امنیتی ءُ نزامی ٹولی ءَ 9 ساھت ئے ٹکّر ءَ ماں شستون ئے بکشان ءَ کُشگ بوتگ، داں انگت ءَ لوگئے مردمان ءَ دیئگ نه بوتگ. ھاندان ءَ داں اے وھدا نه توانتگ آییئے ھاک ایئر دیئگ ءُ نماز جنازہ ئے بارئوا پئیسله بکنت.