رَسانک نیوز/ مروچی شمبے 11 مهر ماہ 1405، راجی پدائیانی سنگر ءَ جارتاک شِنگ کرتگ ءُ دزاپ ءِ منزلآپ دمگئے شاھمرادآباد شهرک ءَ امنیتی ءُ نزامی ٹولییے اے گل ئے پدائیانی بُنجاھئے سرا اُرش ءَ چار پدائی یے کُشگ بوھگ ءَ منّتگ.
اے گل ءَ گوشتگ: پنچشمبے روچ 9 مهر ماہ ءَ دزاپ ءِ منزلآپ دمگ ءَ اے گل ئے پدائیانی بُنجاه امنیتی ٹولییے اُرشئے دپ ءَ کپتگ ءُ اے اُرش ءَ «بلوچستانئے چار سربلند ءُ دلیر ءَ» ساہ داتگ. راجی پدائیانی سنگر ءَ داواہ کرتگ که امنیتی ءُ نزامی ٹولی گوں توپ ءُ بے نندوکیں بالیگراب ءَ بُنجاھئے سرا اُرش کرتگ.
رَسانک ءَ پیشترا ھال سر کرتگ که نزامی ءُ امنیتی ٹولی ءُ سلاہبندیں مردمانی میان ءَ سلاہبندیں ٹکّر ماں شاہمرادآباد شهرک ءَ پنچشمبے روچ ءَ چه سباھئے ساھت 6 ءَ بُنگیج بوتگ ءُ کریب چار ساھت ءَ برجاہ بوتگ. اے ٹکّر ءَ ھماں لوگ که سلاہبندیں مردمانی چیریں جاگه بوتگ سکّ ءَ نُکس بوتگ ءُ اُرش ءَ رَند نزامی ٹولییا دمگئے نندوکیں مردم کِرّ کرتگ اَنت ءُ جاگه ءَ تراکینتگ.
سپاھئے زمینی لشکر ئے کُدس بُنجاه ءَ گوَشتگ: اے ٹکّر ءَ شش سلاہبندیں مردم کُشگ بوتگ. گوں اشیا که راجی پدائیانی سنگر ءَ وتی چار پدائی یے کُشگ بوھگ ءَ الّما منّتگ.
Be the first to comment