راجی پدائیانی سنگر ءَ شستون ءَ وتی پدائیان ءُ امنیتی ٹولییے میان ءَ سلاہ‌بندیں ٹکّر ءَ منّتگ

رَسانک نیوز/ چارشمبے 1 شهریور ماه 1405، راجی پدائیانی سنگر ءَ جارتاک شِنگ کرتگ ءُ گوشتگ: شستون ئے جهادآباد (ڈاب) ءَ اے گل ئے پدائیان ءَ گوں نزامی ٹولییا ٹکّر زورتگ. گل ءَ گوشتگ: اے ٹکّر ءَ که چه ساھت 14:10 ءَ بنگیج ءُ تانکه چُنت ساھت ءَ برجاہ بوتگ گلئے چار پدائی ندر بوتگ.

راجی پدائیانی سنگر ئے رِد ءَ، اے ٹکّر پد چه اشیا که نزامی ءُ امنیتی ٹولی ءَ آیانی بُنجاه ءَ چاربند کرتگ بنگیج بوتگ. اے گل ءَ گوشتگ: رَند چه اشیا که ٹکّر ئے جاگه ءَ سرجم بوتگیں پئوجی پلٹن ئے جاور کئیل ءُ چار کرتگ، گل ءَ لهتیں کمکی پدایی په چاربند ئے پرُوشگ ءَ دیم داتگ که اے پدائیان ءُ نزامی، امنیتی ٹولییے میان ءَ زوریں ٹکّر بوتگ. اے گل ءَ گوشتگ: ندر بوتگیں سئے پدائی چه چاربند ءَ گیر کرتگیں پدائیاں بوتگ اَنت ءُ یکے دگه چه کمک سرکنوکیں پدائیاں بوتگ.

ھمے وڑا راجی پدائیانی سنگر ءَ گوشتگ: اے ٹکّر ءَ سرکار ئے دھاں نزامی کارمند کُشگ ءُ ٹپّیگ بوتگ اَنت. سرتیپ دو «ھسین زریپی»، شستون ءَ سجاد بُنجاھئے کاروایی کنوکیں پلٹن ئے کمانڈر ءُ «اھمد ھراتی زرائتی»، ھمے بُنجاھئے چیریں بهر ئے کارمستر ءُ سروک ماں اے ٹکّر ءَ چه کُشگ بوتگیں نزامی ءُ امنیتی کارمنداں زانگ بوتگ اَنت. پیسرا ھم اے دو نزامی کارمند ئے کُشگ بوھگئے ھال شِنگ کنگ بوتگ.

اے گل ءَ وتی جارتاک ئے آسرا گوشتگ: که آیانی پدائیاں ماں بلوچستان ئے ھَمُک دمگاں است اَنت ءُ «پادلپاش کنوکیں ٹولییے دست دراجی یے»، دیما وتی پدکرد ءَ دئینت.