ریگان ئے تک پرھاد دمگ ءَ سلاہ بندین ءُ پجّار نہ بوتگیں مردمانی تیرگواری ءَ دو بلوچ کُشگ بوتگ

رَسانک نیوز/ چارشمبے 7 مرداد ماہ 1405 ءِ روچ ءَ، ریگانئے گُل سُهر دمگئے تک پرھاد کوھستگ ءَ چُنت ساھت چہ سرکاری ءُ اِنساپ ادارھئے نمایندگانی اُداں روگا پد، نوک ورناییے ھوری ءَ دو بلوچ سلاہ بندین ءُ پجّار نہ بوتگیں مردمانی تیرگواریئے دپا کپتگ ءُ ساھِش داتگ۔ ھال سرکنوکانی رِد ءَ اے ویل ھماں وھدا پیش آتکگ کہ بُرزا گوَشگ بوتگیں نمایندگان ءَ پیسر چہ تیرگواری ءَ چہ دمگئے نندوکیں مردمان ءَ لوٹتگ کہ جاھا یلہ بکننت؛ اے بُن گپّ ءَ دمگئے مردمانی دل پریشانی اُدے ڈگار ءُ زمینانی بارئوا گیش کرتگ.

رَسانک ءَ اے دویں بلوچانی پجّار «مراد سابکی»، 32 سالگ، ایسّا ئے چُک، ءُ «پرویز سابکی»، 16 سالگ، کلندر سلیم ئے چُک، ھر دو ریگان ئے گُل سُهر دمگئے تک پرھاد کوھستگئے نندوک زانتگ.

رَسانک ءِ ھال سرکنوکانی رِد ءَ، ویلئے روچئے سباھا سرکاری نمایندگان ءُ اِنساپ ادارھئے کازی ءُ اے دگہ مردمانی مزنیں کچّی تک پرھاد کوھستگ ءَ شُتگ اَنت ءُ چہ اُد ئے نندوکیں مردمان ءَ لوٹتگش کہ جاھا یلہ بکننت ءُ برو اَنت۔ جهمنندانی رِد ءَ اُد ئے نندوکیں ھاندان چہ دو کرن ءَ پیش اے جاھا آباد اَنت ءُ انّیگیں سالان ءَ پہ ڈگارانی واھُندی، زمین ئے گنجاں، پَٹّ ءُ دشتاں، دَھری وسیلگانی سرا گوں لهتیں اَسَر داریں مردماں جیڑہ ءُ جنجال بوتگ اَنت.

ھال سرکنوک گوَشنت، دو ساھت ءَ پد چہ سرکاری نمایندگانی روگ ءَ مراد ءُ پرویز سابکی پہ وتی پٹّ ءُ ڈگارانی چارگ ءَ دمگئے میدان ءَ شُتگ اَنت کہ پٹ پٹیا سوار سلاہ بندین ءُ پجّار نہ بوتگیں مردمانی تیرگواریئے دپ ءَ کپتگ ءُ جاھا ساھِش داتگ. ویل ءَ پد، دمگئے نندوکیں مردمانی رَندگیری گوں اُداں داشتگیں سرکاری زمّهواران ءَ اے وڑا پسّو دیئگ بوتگ کہ سلاہ بندیں مردماں آمی مردم بوتگ ءُ کازیانی ھمراہ نہ بوتگ اَنت.

داں انگتا تیرگواری کنوکانی پجّار ءُ آیانی سئوب پہ سرکاری وڑ ءُ پئیما گوَشگ نہ بوتگ ءُ ھچ یک چہ اِنساپ ءُ انتزامی اداھانی سروکان ءَ اے درگتا وتی درشانی نہ داتگ.