رَسانک نیوز/ مروچی شمبے 10 مرداد ماہ 1405 ءِ بانگواہ ءَ، دامگان ئے بندیگجاہ ءَ دو بلوچیں بندیگ پہ مواد ئے ھوریں پرمندھیا کہ چہ پیسرا پاھو ئے ھُکمِش وارتگ ءُ 8 مرداد ماہ ءَ پہ ایوکیں واڈ ءَ شور دیئگ بوتگ اَنت، آیانی پاھو ئے ھکمئے سرا کاروایی کنگ بوتگ.
رَسانک ءَ دویں بلوچیں بندیگانی پجّار «مهمداَلی نارویی»، کِساس 50 سالگ، ملک ئے چُک، آروس کرتگ ءُ چار زھگئے پت، زابلئے پازلآباد دمگئے نندوک ءُ «مهمدبکش شہبکش»، 42 سالگ، ابدل ئے چُک، آروس کرتگ ءُ پنچ زھگئے پت، دُزاپ ءِ نندوک زانتگ.
رَسانک ءِ ھال سرکنوکانی رِد ءَ، اے دویں بلوچ سال 1401 ماں دامگان ءَ پہ مواد ئے ھوریں پرمندھیا دزگیر بوتگ اَنت ءُ اُد ئے انکلاب آمیدگِس ءَ آیان ءَ پاھو ئے ھُکم داتگ۔ آیاں 8 مرداد ماہ ءَ دامگان ئے بندیگجاہ ءَ پہ ایوکیں واڈ ءَ شور دیئگ بوتگ اَنت ءُ آیانی کهول پہ گُڑسریں گِندوک ءَ لوٹگ بوتگ اَنت ءُ زی بیگاھی گُڑسریں دیدارش کرتگ.
ھال سرکنوکان ءَ گوَشتگ مهمداَلی ئے برات «سلمان نارویی»، کِساس 39 سالگ، آروس کرتگ ءُ سئے زھگئے پت، زابلئے پازلآباد دمگئے نندوک ءُ پهرہ ئے جهمنند بوتگ، سال 1403 ءَ کرمان سوبهئے راین ءُ گلزار دمگئے راھا پد چہ اشیا کہ سادہ پوشیں نزامی ٹولییا آییئے گاڑییے دیمیں تایر تیر کرتگ، گاڑی ءَ لیٹ وارتگ ءُ سکّ ءَ ٹپّیگ بوتگ۔ آییئے سِرین ئے ھڈّ ءُ مُهرگ پُرشتگ اَنت ءُ سرین ئے رَگ سِستگ.
Be the first to comment